Qendra Kombëtare e Menaxhimit Kombëtar ka bërë thirrje që të shmangen pikëkalimet kufitare me Serbinë më 6 shtator për shkak të paralajmërimeve për bllokada të rrugëve në Serbi.
Kjo thirrje vjen pas paralajmërimeve të ashtuquajturit “Këshill Organizativ për Bllokada” në Serbi, i cili ka bërë të ditur se më 6 Shtator, planifikohen bllokada të rrugëve që çojnë drejt PKK me Republikën e Kosovës.
“Njoftohen të gjithë shtetasit e Republikës së Kosovës dhe pjesëtarët e mërgatës që planifikojnë të kalojnë tranzit përmes territorit të Serbisë, të shmangin të gjitha hyrjet dhe daljet në Pikë Kalimet Kufitare mes Republikës së Kosovës dhe Serbisë. Kjo thirrje vjen pas paralajmërimeve të ashtuquajturit “Këshill Organizativ për Bllokada” në Serbi, i cili ka bërë të ditur se më 6 Shtator 2024, planifikohen bllokada të rrugëve që çojnë drejt PKK me Republikën e Kosovës”,thuhet në njoftim.
Sipas njoftimit, autoritetet kompetente të Kosovës në bashkëpunim me partnerët, i kanë marrë të gjitha veprimet për menaxhim të situatës së paralajmëruar dhe ju inkurajojnë që të ndiqni me kujdes zhvillimet dhe paralajmërimet e reja lidhur me situatën dhe të informoheni vetëm nga burimet zyrtare të institucioneve të Republikës së Kosovës, për të shmangur dezinformatat dhe lajmet e rreme.
Një ditë më parë edhe Ministria e Punëve të Jashtme e Kosovës u ka bërë thirrje mërgimtarëve që t’i shmangin pikëkalimet kufitare me Serbinë.
