Të paktën 17 nxënës humbën jetën në një zjarr që shpërtheu në një shkollë në Kenia qendrore të enjten mbrëma, tha policia.
Dyshohet se numri i të vdekurve mund të rritet pasi më shumë se dhjetë studentë të tjerë u dërguan në spital me djegie të rënda, shkruan BBC.
Shkaku i zjarrit në shkollën fillore Hillside Endarasha në kontenë Nyeri është ende duke u hetuar, tha zëdhënësja e policisë Resila Onyango për mediat lokale.
Një ekip hetuesish është vendosur në shkollë për të përcaktuar rrethanat e aksidentit, shtoi Onyango.
Kryqi i Kuq i Kenias tha se po ofronte mbështetje psikosociale për studentët, mësuesit dhe familjet e prekura.
Zjarret e shpeshta në shkolla në Kenia
Zjarret në shkolla, veçanërisht në shkollat me konvikt, janë relativisht të zakonshme në Kenia.
Në vitin 2017, 10 studente u vranë në një zjarrvënie në një shkollë të mesme vajzash në kryeqytet, Nairobi.
Zjarri më vdekjeprurës në shkollë në Kenia ndodhi më shumë se 20 vjet më parë në qarkun Machakos, në juglindje të Nairobit, kur të paktën 67 studentë vdiqën.
