Një defekt teknik në hekurudhat gjermane ka shkaktuar dje ndërprerjen e qarkullimit të një numri të madh trenash, ku janë prekur qindra pasagjerë.
Kompania hekurudhore Deutsche Bahn (DB) njoftoi se vështirësitë ndodhën në pjesën qendrore të vendit. Përkatësisht, siç raporton Tagesschau si shërbim lajmesh i transmetuesit publik ARD, trafiku është ndërprerë në zonën e gjerë të Frankfurtit për shkak të një mosfunksionimi në komunikimet radiofonike.
Nuk kishte trena për dhe nga Frankfurti, që është qendra e trafikut dhe financiare e Gjermanisë. Qindra pasagjerë po prisnin në stacione, duke mos ditur se kur do të mund të vazhdonin udhëtimin e tyre. Nuk dihet ende se çfarë ka sjellë deri te dështimi teknik.
Më pas DB-ja bëri të ditur se e kanë rregulluar defektin dhe se është rikthyer qarkullimi, por ka mundësi që deri në fund të ditës të ketë sërish shqetësime, siç deklaruan ata.
