Kryetari i Komunës së Prishtinës, Përparim Rama, sot është takuar me përfaqësuesit e Bankës Evropiane për Rindërtim dhe Zhvillim dhe Bordin e Ndërmarrjes Publike Komunale ‘Trafiku Urban’. Temë kryesore e takimit ishte rrjedha e reformës së trafikut urban në kryeqytet.
Në një postim në Facebook, Rama ka thënë se BERZH rikonfirmoi se procesi i blerjes së 30 autobusëve të rinj në kryeqytet nuk është pezulluar.
Ai ka thënë se autobusët do të blihen së shpejti.
“U dakorduam të punojmë së bashku për të mbështetur NPK “Trafiku Urban” për të tejkaluar vështirësitë në përmbushjen e kritereve për blerjen e 30 autobusëve të rinj. Jemi të bindur se së shpejti do të vazhdojmë me blerjen e autobusëve”, ka shkruar Rama.
Gjithashtu Rama ka deklaruar se nga viti i ardhshëm, do të ketë një rrjet më efikas të transportit, linja të reja për autobusë, dhe korridore të dedikuara për autobusë në qytet, përfshirë rritjen e numrit të autobusëve. /Kosovatimes/
