Kryeministri i Kosovës, Albin Kurti ka kujtuar 11 shtatorin e vitit 2001, kur u sulmuan Kullat Binjake në Nju Jork të ShBA-ve.
“Sot, para 23 vjetëve, e kuptuam me mosbesim se një aeroplan pasagjerësh po përplasej në Kullat Binjake në Nju Jork. Aeroplani i dytë, pak minuta më vonë, e vërtetoi faktin që nuk donim ta pranonim: nuk ishte aksident. Simbolet e fuqisë botërore, qendrat e financave, u mbushën me tym dhe rrënoja. Njerëzit që e kuptuan se do të vdisnin, linin porosi lamtumire për të dashurit e tyre”, shkruan Kurti në Facebook.
Ai tha se Amerika, fuqia më e madhe botërore, ajo që kishte ndihmuar Kosovën të kishte paqe pak vite më parë, ishte sulmuar.
“Realitetit dhe kahjes së historisë i duhet vetëm një ditë për të ndryshuar. Në këtë ditë rutinat dhe ritmi i jetës amerikane, që nënkuptonin paqe, ishin thyer. 11 shtatori na kujton për rrezikun e terrorizmit, për globalitetin e këtij rreziku dhe pasojat e tij. Në këtë rast, ndër pasojat ishin jetët e 2977 njerëzve, ndër ta edhe tre shqiptarë, dhe dhimbje për mijëra e miliona të tjerë”, shkruan Kurti.
Tuje tha ai se 11 shtatori ishte sulm ndaj Amerikës dhe ndaj çdo demokracie, ndaj kujtdo që beson në paqe dhe drejtësi. Ishte gjithashtu një alarm për të gjithë që lufta kundër terrorizmit është një luftë e përbashkët, që na kërkon e na takon të gjithëve sepse askush nuk është i kursyer.
“Sot, bashkë me zëvendëskryeministren dhe ministren e Punëve të Jashtme dhe Diasporës, Donika Gërvalla-Schwarz, pesë ministra të kabinetit qeveritar e tre zëvendësministra dhe me zëvendësambasadoren amerikane në Kosovë, Anu Prattipati bëmë homazhe pranë pllakës përkujtimore për viktimat e 11 shtatorit dhe kujtuam familjet e viktimave, jeta e të cilëve u ndryshua në mënyrë të pakthyeshme në këtë ditë”, ka përfunduar Kurti. /Kosovatimes/
