Kryeministri i vendit, Albin Kurti, në mbledhjen e Qeverisë ka thënë se vizita e djeshme në veri nuk është kundër askujt, por përkundrazi është domosdoshmëri për kuptimin e nevojave të qytetarëve.
“Vizitat tona të zyrtarëve shtetëror në këto komuna nuk janë kundër askujt, ato janë të domosdoshme për të kuptuar nevojat që këto komuna i kanë, pasi të kemi lënë anash çfarëdo paragjykimi për të cilën qeveria jonë angazhohet nga dita e parë. Pikërisht për t’i flakur paragjykimet e ndërsjella dhe për të parë se sa anash janë lënë qytetarët atje, ne po i bëjmë këto vizita pune”, ka thënë ai për vizitën në fshatrat e Leposaviqit dhe komunën e Mitrovicës së Veriut.
Tutje Kurti ka thënë se në veri të vendit qeveria nuk po mbyll, por po hap zyre të cilat ofrojnë shërbime të ligjshme.
“Në ato objekte do të funksionalizohen njësia e patentë shoferëve në kuadër të Ministrisë së Mjedisit, Planifikimit Hapësinor dhe Infrastrukturës; Qendra për punë sociale dhe shërbime të mirëqenies sociale në kuadër të Ministrisë së Punës, Financave dhe Transfereve; shërbimi për regjistrimin e automjeteve në kuadër të Ministrisë së Punëve të Brendshme e shërbime të tjera në kuadër të Ministrisë së Ekonomisë, Ministrisë së Industrisë e Ministrisë për Komunitet dhe Kthim”, ka thënë Kurti për planet e ardhshme qeveritare.
Ai ka thënë se Serbia është ri – dëshmuar se është për mbyllje dhe kufizim pas aktit të bllokimit të rrugëve në vendkalimet kufitare vikendin e kaluar.
“Se kush është për mbyllje dhe kufizim e pamë në fund të javës së shkuar. Grupe e persona të maskuar në prani të policisë së Serbisë, në kufi me Republikën e Kosovës por në territor të Serbisë, bënin rolin e policit kufitar duke ndaluar vetura e udhëtarë për të kuptuar përkatësinë e tyre etnike. Gjatë atyre ditëve, policia dhe inteligjenca nga minuta në minutë kanë punuar që planet dhe qëllimet e tyre të dështojnë, siç edhe ndodhi”, ka thënë ai.
Kurti ka përmendur edhe 12 vjetorin e përfundimit të mbikëqyrës ndërkombëtare të pavarësisë së Kosovës, teksa ka shprehur mirënjohje ndaj aleatëve. Ka thënë se jemi përkrah me ta në vlera dhe bindje, teksa e ka cilësuar Republikën e Kosovës si triumf të demokracisë, ligjshmërisë dhe të drejtave të njeriut.
“Ne jemi mirënjohës mbështetjes së miqve dhe aleatëve tanë, atyre 25 shteteve në kuadër të grupit ndërkombëtar mbikëqyrës dhe jemi krenar për kuadrin e fortë institucional që gëzon vendi ynë si rezultat i përpjekjeve të përbashkëta”, ka thënë kryeministri.
Në mesin e 14 pikave që do t’i shqyrtojë ekzekutivi përgjatë mbledhjes, Kurti veçoi si më të rëndësishmet Projektligjin për Byronë Shtetërore për verifikimin dhe konfiskimin e pasurisë së pajustifikueshme dhe Programin Kombëtar për mbrojtje gjithëpërfshirëse të Republikës së Kosovës.
