Posta e Kosovës ka shtuar flotën e saj me 7 automjete të reja, duke zgjeruar kapacitetet e saj për shërbime më të shpejta dhe efikase. Këto automjete të reja i bashkohen motoçikletave elektrike që tashmë janë në përdorim, duke përforcuar flotën e shërbimit postar.
“Me këtë flotë të re, ne synojmë të përmirësojmë përvojën e klientëve tanë duke siguruar që çdo dërgesë të arrijë në kohë dhe me siguri të plotë. Ky hap është në përputhje me përkushtimin tonë për të ofruar shërbime të besueshme dhe efikase për të gjithë qytetarët e Kosovës”, ka thënë gjatë ceremonisë së përurimit, kryeshefja ekzekutive e Postës së Kosovës, Nora Rraci.
Ministrja e Ekonomisë, Artane Rizvanolli, premtoi përkrahje për ndërmarrjet publike, “e në veçanti ato që tregojnë vullnet e punë për rezultate, si është Posta e Kosovës”.
“Ky investim i fundit synon të rrisë cilësinë e shërbimeve të shpërndarjes së dërgesave për qytetarët e Kosovës, me fokus në përmirësimin e kohës së dorëzimit dhe mbulimin e gjithë territorit të vendit. Me shtimin e këtyre automjeteve të reja, Posta e Kosovës është më e përgatitur për të përmbushur kërkesat në rritje për shërbime postare dhe logjistike, duke garantuar mbërritje të shpejtë dhe të sigurt të dërgesave në destinacionet e tyre”, thuhet në komunikatën për media të PK-së. /Kosovatimes/
