Është arrestuar i dyshuari për falsifikim të patentë shoferit në Gjilan, me ç’rast është bërë edhe sekuestrimi i dokumentit. Policia, konkretisht Drejtoria për Hetimin e Krimeve Ekonomike dhe Korrupsionit, gjatë hulumtimit të rastit ka vërtetuar patentë shoferi nuk është lëshuar nga institucioni përkatës.
Përmes një komunikate për medie, bëhet e ditur se patentë shoferi është sekuestruar nga i dyshuari dhe nga departamenti për patentë shoferë është vërtetuar se i njëjti nuk është lëshuar nga institucioni përkatës.
“Gjatë zhvillimit të procedurave hetimore, i dyshuari ka pranuar se këtë patentë shofer të falsifikuar e kishte pranuar nga një person i panjohur dhe se kishte paguar një shumë parash për ta siguruar patentën. Mbi bazën e këtyre veprimeve është krijuar dyshimi se i dyshuari i lartcekur ka kryer veprën penale: ‘Falsifikim i dokumenteve ‘, nga neni 390 i KPRK-ës”, thuhet në komunikatë.
Në lidhje me rastin, njoftohet se personi i dyshuar është intervistuar në prezencë të avokatit dhe më pas është njoftuar prokurori i çështjes i cili ka lëshuar aktvendim mbi ndalimin e personit të dyshuar për 48 orë.
