Në një nga videot e fundit në rrjetet sociale, punonjësit e spitalit në Foggia, në jug të vendit, shihen të barrikaduar në një dhomë. Ata u barrikaduan kur në spital erdhën 50 të afërm dhe miq të 23-vjeçares që humbi jetën pas operacionit urgjent. Me atë rast janë lënduar disa punonjës. Ky rast ka ndodhur të premten, më 6 shtator.
Spitali i lartpërmendur raportoi një sulm tjetër dy ditë më vonë, pra se pacienti po godiste tre infermierë të urgjencës. Të martën, më 10 shtator, një pacient sulmoi një mjek në spitalin në Casarano.
Dy sulme të tjera fizike u raportuan këtë javë në provincën e Napolit, ku punonjësit shëndetësorë thanë se sulmi ndodhi pasi pacientëve dhe familjeve të tyre iu kërkua të prisnin radhën. Një i afërm i një pacienti goditi një praktikant spitali muajin e kaluar në Palermo.
Antonio De Palma, president i sindikatës Nursing Up, tha se kurrë nuk kishte pasur një nivel të tillë rreziku dhe agresioni. Ai u bëri thirrje autoriteteve që urgjentisht të merren me këtë situatë dhe të mendojnë për përfshirjen e ushtrisë në institucionet shëndetësore.
Presidenti i Federatës Italiane të Shoqatave Mjekësore-Shkencore (Fism), Loreto Gesualdo, propozoi që për tre vjet t’u mohohet kujdesi shëndetësor falas atyre që sulmojnë punonjësit shëndetësorë dhe/ose dëmtojnë një objekt shëndetësor.
Sipas të dhënave të Fismo, vitin e kaluar janë regjistruar më shumë se 16,000 sulme verbale dhe fizike ndaj punonjësve të kujdesit shëndetësor. Vitin e kaluar, një 62-vjeçar u dënua me 16 vjet burg për vrasjen e një mjeku para një spitali në Milano në vitin 2022. I dënuari ka pohuar se ka marrë terapi të padobishme.
Shumë sulme janë rezultat i mungesës së punonjësve shëndetësorë dhe i zhgënjimit për shkak të pritjeve të gjata për kirurgji dhe konsultime. Kjo mungesë u përshkallëzua gjatë pandemisë së koronavirusit, kur u përshpejtua largimi i këtyre punëtorëve jashtë vendit. Pavarësisht problemeve në shëndetësi, qeveria e kryeministrit Giorgio Meloni po planifikon shkurtime shtesë financiare në shëndetësi.
Sipas të dhënave nga Forumi i Shoqatave Shkencore të Klinikëve Spitalorë dhe Universitar Italianë të vitit 2023, këtij vendi i mungonin 30 mijë mjekë. Mes viteve 2010 dhe 2020 janë mbyllur 111 spitale dhe 113 qendra emergjente, shkruan Gazeta Guardian.
