Presidenti ukrainas Volodymyr Zelensky ka kritikuar ashpër vendet perëndimore për, siç pretendon ai, pavendosmërinë në ofrimin e mbështetjes së plotë për Ukrainën në rrëzimin e raketave dhe dronëve rusë. Duke folur në një konferencë për shtyp në Kiev, Zelensky theksoi se Perëndimi, megjithëse ndihmon Izraelin në situata të ngjashme, nuk mori një vendim për të rrëzuar së bashku raketat ruse dhe dronët iranianë Shahed mbi Ukrainë.
Zelensky shprehu pakënaqësinë për faktin se vetëm Bjellorusia ka rrëzuar me sukses dronët rusë deri më tani, duke theksuar se kjo është “poshtëruese” për botën demokratike perëndimore. “Nëse ata mund të rrëzojnë raketa dhe dron në Lindjen e Mesme, pse të mos bëjnë të njëjtën gjë edhe mbi Ukrainën?” pyeti ai, duke akuzuar Perëndimin se është “shumë i frikësuar” dhe se i shmanget veprimit.
Kritikat e tij vijnë në një kohë kur presidenti rus Vladimir Putin paralajmëron se përdorimi i armëve perëndimore kundër Rusisë do të nënkuptonte pjesëmarrje të drejtpërdrejtë të vendeve të NATO-s në konflikt. Zelensky përsëriti gjithashtu pakënaqësinë e tij që Perëndimi nuk e ka lejuar Ukrainën të sulmojë objektivat ruse thellë brenda Rusisë, pavarësisht kërkesave prej muajsh të Kievit për raketa perëndimore me rreze të gjatë.
Apel për përshkallëzim
Në bisedimet me zyrtarët amerikanë dhe britanikë, duke përfshirë ministrin e Jashtëm Antony Blinken dhe David Lammy , Zelenski theksoi urgjencën e sigurimit të Ukrainës me aftësi ushtarake me rreze të gjatë. “Është e qartë pse Ukraina ka nevojë për këto kapacitete,” tha ai, duke theksuar rëndësinë e goditjes së pozicioneve kryesore ushtarake ruse, qendrave logjistike dhe rezervave.
