Sot ka dështuar edhe një tentim i organizimit të takimit të përbashkët mes Kosovës e Serbisë në nivel kryenegociatorësh. Ish shefi i grupit negociator për bisedime, Avni Arifi tha se për takimin e sotëm nuk ka pasur agjendë të harmonizuar.
Arifi tha se iniciativa e përfaqësuesit të posaçëm të BE-së në dialogun Kosovë-Serbi, Mirosllav Lajçak, për një takim të tillë ka qenë krejt koti.
“Pozicionet edhe të Kosovës edhe të Serbisë kanë qenë të qarta, sidomos pas qëndrimeve të Vuçiqit dhe barrikadimit të Kosovës rreth tri pikave që i përmendi kryeministri. Më të vërtetë është e pa qartë se çka ka dashur të arrijë Lajçak në Bruksel. Një takim koti me një epilog të pritur dhe me një trajektore të dialogut e cila uroj që me ardhjen e zonjës Kaja Kallas të ndërpritet në tërësi dhe të kthehet dhe të fillojë me një format të ri, se kjo qasje është vetëm një humbje kohe”, deklaroi ai në “Info Plus” të RTK-së.
Sipas tij për takimin e sotëm nuk ka pasur agjendë të harmonizuar. Ai theksoi se edhe Bislimi edhe Petkoviq dolën me pika të ndryshme.
“Është e çuditshme pse duhet shkuar në Bruksel dhe aty të vihet për propozime. Agjenda duhet t’i dërgohet edhe Prishtinës dhe Beogradit dhe nëse e gjejnë gjuhën të përbashkët atëherë duhet t’i ftosh në Bruksel. Përndryshe ky mbetet një lloj turizmi koti”,deklaroi ai.
