Dogana e Kosovës ka identifikuar mbrëmë një sasi të konsiderueshme mallrash të padeklaruara gjatë një kontrolli të kryer në një kamion trasportues në pikën kufitare të Hanit të Elezit.
Sipas njoftimit të Doganës, rreth orës 22:35, një kamion me targa të huaja, u paraqit në hyrje të pikës kufitare.
Gjatë kontrollit, u zbuluan dy pako mjekësore në total prej 80 pakove me mallra të padeklaruara.
“Bazuar në këto të gjetura, është konstatuar se shoferi ka kryer kundërvajtje doganore, të sanksionuar sipas nenit 244 pika 1.11 të Kodit Doganor dhe të Akcizave të Kosovës (KDAK)”, thuhet në njoftimin e Doganës.
Dogana e Kosovës thotë se do të mbetet e përkushtuar në zbatimin rigoroz të ligjit dhe në garantimin e sigurisë së kufijve të vendit, duke parandaluar çdo përpjekje për shmangie të detyrimeve doganore dhe kontrabandë. /Kosovatimes/
