Shkruan: Shenoll MUHARrEMI
Këtu nuk shkon diçka. Ndoshta nëse kishte qenë një rast për ndërhyrje politike në RTK, kishte qenë më i besueshëm. Edhe pse në Ballkan, mundet me ndodhë gjithçka, kjo nuk duket kredibile.
Normal që tash sa më shumë intensifikohet dhe afrohen zgjedhjet, edhe raste mundemi me pas më shumë. Me siguri që edhe ka me pas raste që kanë bazë. Ndoshta andej ku ka shumë kontrata, për infrastrukturë, por Dejona?
Korrupsionin nuk mundesh me ndalu në kushtet aktuale socio-ekonomike. Edhe pse vet Kurti ndoshta nuk korruptohet, por një zyrtar në një komunë të largët, apo zyrtar në ministrinë x, mundet. Për atë, korrupsioni ndërlidhet me kushtet ekonomike, por edhe me edukim kualitativ dhe moral.
Por ideja me paraqitë Kurtin si të korruptuar, ose qeverinë e tij si më të korruptuarën nuk është e arsyeshme. Korrupsionin institucional në Kosovë ka qenë pandemik më herët. Tash nuk është. Mjafton kaq.
Kjo çfarë po ndodhë është që, në mungesë të alternativave të ofruara politike, fokusi këto zgjedhje (deri tani) është në kritikë vetëm. Të paraqitet sa më keq qeveria Kurti. Kjo nuk jep rezultate. Kurti është promotori kryesor i luftës kundër korrupsionit dhe thuajse askush në Kosovë nuk beson që ai mund të fajësohet për korrupsion. Në fakt, kjo do e forcojë apo mirëmbajë një pjesë të përkrahjes për LVV.
Mënyra si mund të ‘rrëzohet’ LVV dhe Kurti ndoshta bazohet ndryshe. Fillimisht partitë opozitare duhet të kenë integritet të lartë, për tu shkëputur me të kaluarën. Pastaj, pasiqë janë të pastra, duhet të ofrojnë një alternativë më të mirë sesa Kurti e LVV. Kjo nuk është e vështirë, se vet LVV nuk ka një program zhvillimor, ka ardhur në pushtet për shkak se tjerët janë stërkequr, janë ndëshkuar nga qytetarët.
Kështu, Dejona, për korrupsion, dy raste të larta? Si dihet, por do të dyshoja të dal diçka nga kjo. Ajo duket që më shumë është e fokusuar në ideologji politike dhe ekonomike. Sidomos aspektet ekonomike që i ka prezantuar ‘anti-biznes’ nuk i përshtatet nevojave ekonomike të Kosovës, nuk e zhbllokon potencialin e saj socio-ekonomik. Për gjërat tjera të shohim, epilogun e hetimeve.
