Autoritetet JAPONEZE kanë urdhëruar evakuimin e dhjetëra mijëra banorëve të Ishikawas për shkak të kërcënimit të përmbytjeve të shkaktuara nga shirat e dendur. Rreth 30,000 banorë të qyteteve Wajima dhe Suzu u detyruan të largoheshin nga zona, thanë zyrtarët lokalë.
Tre lumenj në rajon përmbytën komunitetet aty pranë, tha zyrtari për AFP, duke shtuar se dëmet në ndërtesa dhe infrastrukturë po vlerësoheshin. Agjencia Meteorologjike e Japonisë ka vënë në gatishmëri të lartë prefekturën Ishikawa, duke paralajmëruar për rreziqe “vdekjeprurëse”.
Imazhet e transmetuara nga transmetuesi publik NHK tregojnë një rrugë të përmbytur në qytetin e Wajima. Wajima dhe Suzu ishin ndër qytetet më të goditura nga tërmeti 7.5 ballë i 1 janarit, i cili vrau të paktën 236 njerëz.
Rajoni është ende duke u rikuperuar nga kjo fatkeqësi, e cila rrafshoi ndërtesat, shkatërroi rrugët dhe shkaktoi një zjarr të madh. Reshjet në Japoni kanë arritur nivele rekord vitet e fundit në disa pjesë të vendit, ndonjëherë me përmbytje vdekjeprurëse dhe rrëshqitje dheu. Ekspertët besojnë se ndryshimi i klimës rrit shpeshtësinë, intensitetin dhe paparashikueshmërinë e këtyre fenomeneve.
