Shefi i shtabit të presidentit francez Emmanuel Macron njoftoi sot se Franca ka një qeveri të re, e cila duhet t’i japë fund pasigurisë politike pas zgjedhjeve të parakohshme që nuk nxorrën një fitues të qartë.
Ministër i Jashtëm në qeverinë e re të përbërë kryesisht nga parti centriste dhe konservatore do të jetë Jean-Noel Barrot. Antoine Armand (33) do të shërbejë si ministër i financave, tha Alexis Kohler vonë të shtunën.
Sebastien Lecornu do të mbetet ministër i Mbrojtjes, shtoi ai.
Analistët: Është e diskutueshme nëse qeveria e re do të tregojë stabilitet dhe do të shtyjë reformat në parlament
Është e diskutueshme nëse qeveria e re do të tregojë stabilitet dhe nëse do të ketë sukses t’i shtyjë reformat në parlament, thonë analistët, dhe sfida e parë dhe më e vështirë do të jetë miratimi i buxhetit për vitin 2025.
Qeveria e udhëhequr nga konservatori Michel Barnier, një ish-negociator i Bashkimit Evropian për Brexit-in, do të përballet me detyrën e vështirë për të rregulluar vrimat në financat publike, gjë që mund të nënkuptojë që të zgjedhë një rritje të taksave politikisht jopopullore.
Kryeministri i ri ka një mision kërkues
Macron emëroi Barnier, një veteran politik 73-vjeçar, si kryeministër në fillim të këtij muaji, por negociatat e gjata që ai ka kryer për të mbledhur ekipin e tij tregojnë se ai përballet me një mision kërkues.
Partitë centriste dhe konservatore kanë gjetur gjuhën e përbashkët, por ato do të varen nga të tjerët, veçanërisht nga Rally National (RN), partia e ekstremit të djathtë të Marine Le Pen, për të qëndruar në pushtet dhe nga parlamenti i ndarë që të miratojë ligje.
RN i ka dhënë mbështetje të heshtur mandatit të Michel Barnier si kryeministër, por ka rezervuar të drejtën të tërhiqet në çdo kohë nëse qeveria e re nuk arrin të përmbushë premtimet për emigracionin, sigurinë dhe çështje të tjera.
