Nëse gjithçka shkon sipas planit, i ashtuquajturi “Shteti Sovran i Urdhrit Bektashi” do të bëhet vendi më i vogël në botë, vetëm sa një e katërta e madhësisë së Vatikanit. Toka prej 10 hektarësh do të ketë administrimin, pasaportat dhe kufijtë e saj, shkruan Euronews.
Shteti i ri do të lejonte alkoolin, do t’i lejonte gratë të veshin atë që duan dhe nuk do të vendoste asnjë rregull jetese, duke reflektuar praktikat tolerante të Urdhrit Bektashi. Rama tha se qëllimi i shtetit të ri është të promovojë një version tolerant të islamit për të cilin Shqipëria krenohet.
“Ne duhet të kujdesemi për këtë thesar, që është toleranca fetare dhe të cilën nuk duhet ta marrim kurrë si të mirëqenë”, tha ai për New York Times.
Historia e bektashinjve daton në shekullin e 13-të të Perandorisë Osmane, por gati një shekull më parë, selia e Urdhrit u zhvendos në Tiranë pasi Mustafa Kemal Ataturk, themeluesi i Republikës Turke, e ndaloi hyrjen në Turqi.
Urdhri Bektashi ka një traditë të gjatë mistike në Shqipëri. Ata mbështeteshin nga jeniçerët, ushtarë elitë të Perandorisë Osmane të rekrutuar kryesisht nga zonat e krishtera të Ballkanit. Besimi sufi nuk i detyron besimtarët të respektojnë bazat e Islamit tradicional.
Megjithatë, toleranca nuk çoi në mbrojtje nga persekutimi. Për qindra vjet, besimtarët kanë qenë nën presion – qofshin zotërit e tyre të krishterë, myslimanë apo ateistë – që i çoi ata në vendet fqinje si Kosova dhe Maqedonia që nga pushtimi i Ballkanit nga Perandoria Osmane në shekujt 14 dhe 15.
Bektashinjtë janë të përkushtuar ndaj njerëzve të mençur, të njohur si dervishët. Dervish Baba Mondi është udhëheqësi aktual shpirtëror i urdhrit. Ndjekësit e tij e njohin me titullin e tij zyrtar, Shenjtëria e Tij Haxhi Dede Baba.
Baba Mondi duhet të jetë udhëheqësi i Shtetit Sovran të Urdhrit Bektashi. Ai thotë se vendimet do të merren me “dashuri dhe mirësi”. Në një intervistë për Euronews në 2018, ai tha se “të jesh bektashi do të thotë të jesh njeri. Ne e ndërtuam komunitetin tonë bazuar në parimet e paqes, dashurisë dhe respektit të ndërsjellë”.
Një ekip ekspertësh po punon për legjislacionin që përcakton statusin sovran të shtetit të ri brenda Shqipërisë. Partia Socialiste në pushtet e Ramës do të duhet gjithashtu ta mbështesë atë.
Baba Mondi shprehu shpresën se Shtetet e Bashkuara dhe fuqitë e tjera perëndimore do ta njohin sovranitetin e vendit të tij.
“Ne meritojmë një shtet. Ne jemi të vetmit në botë që flasim të vërtetën për Islamin dhe nuk e përziejmë atë me politikën”, tha Baba Mondi për The New York Times.
