Një tërmet me magnitudë 4.5 ballë të shkallës Rihter ka goditur Bosnjën dhe Hercegovinën sot në orën 14:23, ndërsa tërmeti është ndjerë edhe në Kroaci, raportojnë mediat.
Qendra sizmologjike evropiano-mesdhetare tha se tërmeti është regjistruar 39 kilometra në veriperëndim të Zenicës, në një thellësi prej pesë kilometrash.
Portali Klix.ba raporton se tërmeti është ndjerë në një zonë më të gjerë të Bosnjës qendrore dhe, sipas dëshmive, është ndjerë veçanërisht nga qytetarët e Teshnjit, të cilët thonë se ka zgjatur rreth 20 sekonda.
Lëkundjet janë raportuar edhe nga qytetarët e Travnikut, Zenicës, Zavidoviqit, Çelinacit, Banjalukës dhe Gradaçacit.
Për momentin nuk ka informacione për dëme materiale apo të lënduar.
