Shefi i Grupit Parlamentar të Partisë Demokratike të Kosovës, Abelard Tahiri, ka thënë se shpreson të mos shtohen sanksionet e vendosura nga aleatët perëndimor ndaj Kosovës gjatë qeverisjes aktuale.
Pas mbledhjes së Kryesisë së Kuvendit, Tahiri ka thënë se uron që sanksionet të mos rriten deri më 9 shkurt, pasi sipas tij, pas kësaj date në krye të ekzekutivit do të jetë dikush tjetër.
Tahiri ka shtuar se Kosova edhe pas një viti që nga sulmi në Banjskë, vazhdon të jetë e izoluar, teksa Serbia nuk ka marrë asnjë ndëshkim lidhur me këtë rast.
“Nesër bëhen një vit prej kur ka ndodhur sulmi në Banjskë ku e kemi humbur heroin Afrim Bunjaku. Fatkeqësisht vendi ynë tash e një vit vazhdon të jetë i izoluar, vazhdon të jetë nën sanksione dhe në anën tjetër Serbia nuk e ka marrë as edhe një ndëshkim të vetëm sa i përket këtij sulmi. Fatkeqësisht vazhdojmë t’i kemi masat e njëjta në fuqi. Dëmet për Kosovën vazhdojnë të jenë të mëdha, e Serbia vazhdon të amnistohet. Lutemi që këto sanksione të mos rriten nga aleatët tanë deri më 9 shkurt”, është shprehur ai.
Tahiri, ka thënë se kanë kërkuar që të shkarkohet bordi i RTK-së, pas publikimit të një lajmi nga ky medium.
Shefi i deputetëve të PDK-së, theksoi se me publikimin e atij lajmi janë rrezikuar një numër i gazetarëve të mediumeve të tjera që janë prekur nga ai artikull, dhe bëri thirrje që personat përgjegjës duhet që të ndiqen edhe penalisht.
“Edhe sot kemi pritur që administrata ta sjellë për diskutim e Kryesia t’i propozojë një çështje të tillë, por Komisioni po e zvarrit një çështje të tillë. Shpresojmë që kjo çështje të diskutohet sot ose nesër, meqenëse jo në këtë javë në javën që vjen të vihet në diskutim shkarkimi i këtyre njerëzve të papërgjegjshëm që kanë shkaktuar dëm të madh. Nuk duhet lejuar që këto gjëra të ndodhin në një televizion që paguhet nga taksat e qytetarëve tanë”, tha Tahiri.
