Shefi i GP të Aleancës për Ardhmërinë e Kosovës, Besnik Tahiri, tha se në seancën e radhës, do të votohet Projektligji për Zyrtarët Publik, duke theksuar se qeveria nuk po heq dorë pavarësisht komenteve të Bashkimit Evropian.
“Votim për ndryshimin dhe plotësim për projektligjin për zyrtarët publik. Edhe përkundër faktit që ka pasur një koment nga BE, nga Komisioni i Venecias vazhdon kjo qeveri që përmes këtij ligji ta kap administratën e Kosovës. Kjo qeveri vazhdojnë të kenë një numër të madh të Ushtruesve të Detyrës. Ky ligj po ashtu synon që të gjithë nivelin e mesëm ta partizoj. Ky ligj duhet të bie dhe nuk duhet që të kaloj. Sepse i bëhet një dëm i madh Kosovës”, tha Tahiri.
Ai shtoi se po ashtu është bërë një diskriminim i madh ndaj të gjithë zyrtarëve të teknologjisë informative në komuna.
Tahiri foli edhe për migrimin duke thënë se këto katër vite kanë qenë vite qe e kanë mbytë shpresën e secilit të ri, që në Kosovë mund të jetohet.
“Ikja është bë masive e cila rezulton me regjistrimin e popullsisë. Shifra e njerëzve që kanë ikur nga Kosova janë 30 mijë në Prizren, mbi 15 mijë ne Gjakove, 14 mijë në Suharekë, ikje për shkak të mungesës së shpresës dhe drejtësisë në vend”, theskoi ai.
Tutje Tahiri tha se të gjitha ligjet janë në pauzë dhe kanë mbetur në sirtarë.
“Qeveria flet për papunësi e që thotë se është 4%”. Paramendoni Kosova e ka papunësinë më te vogël se vendet evropiane. Ku jetojnë këta njerëz”, tha Tahiri.
Tahiri theksoi se kërkesa e tij e parë ishte që të debatohet për tri vjet qeveri. Por ajo që u tha nga Kusari është se kryeministri nuk gjendet në vend.
“Temat që lidhen me nismat rajonale. Kosova është në black list. Nuk është në listën e zeze formalisht por është në listën e zezë, jemi përjashtuar nga ushtrime Defender, jemi nën sanksione dhe pak ka optimizëm të largohen sepse duhet konsensus nga BE. Ne nuk kemi kurrfarë komunikimi me SHBA, asnjë njohje për katër vite”, tha ai.
Sipas tij pas 24 shtatorit është dashur që Serbia të ketë trajtim ndryshe. Qeveria jonë duke mos bashkëpunuar me ndërkombëtarët ka lejuar që për këtë çështje të flasin armiqtë.
