Trajneri i ri Romës, Ivan Juric, ka treguar se lojtarët e skuadrës ishin të zhgënjyer nga largimi i ish-trajnerit Daniele De Rossi, i cili u shkarkua të mërkurën pasi Roma dështoi të siguronte fitore në katër ndeshjet e para të Serie A.
De Rossi, një legjendë e klubit që kaloi pothuajse dy dekada si lojtar te Roma, u zëvendësua nga Juric, ish-trajner i Torinos.
“Kur u bëra trajner, vura re që disa nga djemtë ishin jashtëzakonisht të zhgënjyer nga shkarkimi i Daniele. Ata ishin të sinqertë dhe më treguan se ishin shumë të mërzitur për largimin e tij. Kjo sinqeritet është diçka që e vlerësova shumë, pasi shpeshherë lojtarët i fshehin këto emocione”, ka thënë Juric për Sky Sports.
Megjithatë, Juric është shprehur i kënaqur me përpjekjet e ekipit, i cili siguroi fitoren e parë të sezonit, duke mposhtur Udinese-n me rezultat 3-0 të dielën.
Roma, që tani ka gjashtë pikë pas pesë ndeshjeve, do të përballet me Athletic Bilbaon në Europa League të enjten, ndërsa të dielën ndeshet me Venezian në Serie A.
“Ne kemi një skuadër të madhe, gjë që më lejon të bëj rotacione. Në dy javët e ardhshme do të ketë shumë ndryshime në formacion”, ka thënë Juric.
