Shkruan: Milazim KRASNIQI
Pyetjet që nuk kanë marrë ende përgjigje për agresionin terrorist të Banjskes:
- Si ka dalë gjithë ai armatim dhe ai personel i armatosur nga Serbia, pa u hetuar, pa u legjitimuar, pa u ndaluar?
- Si ka hyrë pa u zbuluar gjithë ai armatim e personel i armatosur nga Serbia në Kosovë, kur kufirin e ruan KFOR-i, policia e Kosovës dhe pikat doganore janë funksionale?
- Si ka qenë e mundshme që manastiri të merrej nën kontrollin e terroristëve, duke qenë objekt fetar i mbrojtur nga policia e Kosovës? Pra, a ka pasur mbrojtje policore ndaj atij objekti, a nuk ka pasur?
- Pse hierarkët e manastirit dhe Kishës Ortodokse Serbe nuk i kanë njoftuar organet, kur aty janë vendosur persona të armatosur dhe gjithë ato armatime?
- Meqë vëzhgimi me dronë në ditën e sulmit rezultoi i suksesshëm, duke identifikuar edhe kreun e grupit terrorist, Millan Radojçiqin, shtrohet pyetja se a janë bërë vëzhgime edhe më parë dhe a ka pasur identifikime të lëvizjeve të panatyrshme edhe më herët?
- Zvogëlimi i forcave policore në objektet komunale a është shoqëruar me shtimin e koordinimit me KFOR-in, apo është lënë vakuum i sigurisë?
- Nëse grupimi terrorist është rrethuar, si u bë që shumica absolute e tyre arritën të largohen, pa u detyruar ta shpërthejnë rrethimin dhe pa ferrë në këmbë?
- A e ka inkurajuar këtë agresion vendimi i Bashkimit Evropian që Kosova të futej nën masa ndëshkuese e Serbia të lavdërohej si palë konstruktive?
- Pse nuk po i vendosen nga Bashkimi Evropian Serbisë masa, tash kur është e qartë se grupimi terrorist ka qenë i lidhur me qeverinë serbe?
- Meqë dihet saktë që ushtria serbe nuk guxon të hyjë në Kosovë, për shkak të Marrëveshjes Ushtarake-Teknike e cila është në fuqi, pse iu kushtua aq shumë vëmendje lëvizjes së ushtrisë serbe: për ta relativizuar fajin e qeverisë serbe për sulmin terrorist në Banjskë, a pse?
- Pse duhet të jepen propozime për mandatin e KFOR-it në veri, kur mandati i tij është i plotë në tërë Kosovën, pra edhe në veri, në rastin e çdo krize? Pse u dashka që problemi politik të degradojë në problem ushtarak?
- A duhet të mbajë ndokush në qeverinë tonë përgjegjësi për të gjithë këto zhvillime destabilizuese, nëse ato kanë mundur të parandaloheshin? Meqë Serbia e ka përgjegjësinë e vet, BE e ka përgjegjësinë e vet, edhe Kosova duhet ta mbajë përgjegjësinë e vet, e pakta që ajo t’i shërbejë për t’u aftësuar që të shmang rreziqet në të ardhmen.
- Pse gjithë ky triumfalizëm? Është gabim nëse të gjitha gabimet që janë bërë, si në procesin politik, si në terren, fshihen pas triumfalizmit. Nuk ka asnjë arsye për triumfalizëm, sepse konflikti ka ndodhë në territorin tonë dhe ka pasoja për stabilitetin dhe imazhin e vendit tonë. (1 tetor 2023)
