Sot, Drejtori i Përgjithshëm i Shërbimit Korrektues të Kosovës, Ismail Dibrani dhe Kryesuesi i Këshillit Gjyqësor të Kosovës (KGJK), Albert Zogaj kanë nënshkruar Memorandum të Bashkëpunimit në mes të SHKK-së dhe KGJK-së.
Shërbimin Korrektues i Kosovës njofton se nënshkrimi i këtij Memorandumi ka për qëllim avancimin e mëtutjeshëm të bashkëpunimit në mes të dy institucioneve për përfshirjen e informacioneve të nevojshme në Sistemin për Menaxhimin Informativ të Lëndëve (SMIL).
Sipas njoftimit Drejtori i Përgjithshëm i SHKK-së Dibrani dhe Kryesuesi Zogaj, kanë theksuar rëndësinë e avancimit të mëtejmë të sistemit SMIL në gjyqësor, i cili synon digjitalizimin e punës, rritjen e transparencës dhe forcimin e sundimit të ligjit, bazuar në standardet dhe vlerat e Bashkimit Evropian.
Të dy bashkëbiseduesit kanë shprehur gatishmërinë e vazhdimit të bashkëpunimit të mëtejmë ndërinstitucional, me qëllim të arritjes së objektivave të përbashkëta. /Kosovatimes/
