Shkruan: Flamur HYSENI
Shqipëria, për dallim prej shteteve komuniste në periudhën 1945 – 1991, e ka pasur fatin e tillë që edhe komunizmin ta kishte të veçantë. Pasojat dihen. Shqipëria komuniste me diktaturën e saj më 1967 me dekret e ka pas shpallë Shqipërinë shtet ateist. I pari shtet i tillë në botë.
KM i Shqipërisë, me 2024, nga Amerika e publikon idenë për një Shtet Sovran Bektashi në Tiranë. Ide të tilla nuk publikohen rastësisht! Kjo ide edhe po të jetë e rastësishme, KM, e dinë që opinioni publik shqiptar nuk e merr si të tij, por, diçka më shumë sesa vetëm të tij.
Përmes New York Times, KM i tregoi botes se, Shqipëria nën qeverisjen e tij dëshiron të krijon një “Vatikan 2”, por, me një komunitet fetar jo shumicë. Komunitet fetar bektashi që janë rreth 5%. E me këtë komunitet të vogël po dëshiron me promovu tolerancën fetare, e cila asnjë here nuk ka qenë problem i kombit shqiptar. Leximi politik i kësaj ide do të thotë rrezikim deri në prishje i tolerancës fetare në kombin shqiptarë. E vetmja vlerë e pa degraduar deri më tani në shkallë kombëtare.
KM, përveç intervistës, të nesërmen përmes fjalimit nga foltorja e OKB-së, ja bëri me dije botës se, Tirana është qyteti ku toleranca fetare mund të promovohet përmes një komuniteti të vogël fetar. E çuditshme se si paska mundësi me promovu tolerancën fetare komuniteti prej 5%, në një vend të vogël si Shqipëria, me një qytet – kryeqytet të sapo dal nga “lloqi” si Tirana.
Ideja edhe po të realizohet është kundër kushtetuese. Gjykata Kushtetuese e Shqipërisë do ta ketë sfidën më të madhe në historinë e saj, nëse një vendim i tillë do të realizohet.
Ide të tilla politike me efekte ndërkombëtare, zakonisht paraqiten nga liderët e vendeve të pazhvilluara.
Politizimi i veprimtarive fetare është ngatërresa ma e suksesshme te popujt që kanë edukim të dobët, media amatore dhe elita intelektuale të korruptuara.
Dalja me idenë për një Shtet Sovran Bektashi në Tiranë nuk përjashtohet si mundësi e tërheqjes së vëmendjes rajonale dhe më gjerë, për të relativizu çështjen e themelimit të Asociacionit të Komunave me Shumicë Serbe në Kosovë. Nuk është befasi që pas disa dite me u shfaqë ndonjë diplomat evropian me marrë shembull duke thënë, Shqipëria po e bënë një shtet të vogël në Tiranë pa ja kërku askush në emër të paqes dhe tolerancës. Çka ka Kosova, pse nuk e bënë Asociacionin.
Me siguri edhe për këtë ide duhet të shpresojmë tek Amerika, se ndoshta e ruan edhe kësaj here kompaktësinë e shtetit shqiptar!
Thënia e famshme, “Zot ruaje Shqipërinë nga shqiptarët” vlen ende.
