Shkruan: Idriz MORINA
Do të mbetet gjatë në kujtesë mesazhi i hapur, pa asnjë mbështjellim diplomatik, për popullin e Kosovës edhe nga një ambasador amerikan!
Gjërat paskan shkuar aq keq, sa tashmë, po konsiderohet se qeverisja jonë paska “urinuar” te portat e BE-së!
Vetë diplomati amerikan ka kërkuar falje paraprakisht për fjalët e papërshtatshme që përmbante storia e kujtesës së tij familjare, por, që ai e ndiente nevojën ta thoshte deri në fund, për të përshkruar ecurinë politike dhe diplomatike të Kosovës, në rrugën e integrimit!
“Gjyshi im ka thënë, dhe ju lutem më falni për karakterin e shëmtuar paksa, se nëse dëshiron të bëhesh pjesë e një klubi, atëherë mos urino te dera e klubit. Çfarë dua të them është se ne duam të përkrahim Kosovën në rrugën euroatlantike, kemi bërë shumë, presidentë, sekretarë të shtetit e ambasadorë për të avancuar këtë. Ne duam të ndihmojmë. Presim çdo qeveri e Kosovës të na jap argumentet më të mira, municionet më të mira në këto bisedime”, citohet deklarata e thënë nga ambasadori Hovenier, gjatë Samitit të Kosovës për Paqe dhe Demokraci.
Kjo deklaratë edhe mund të ishte interpretuar ndryshe, sikur të mos ishte thënë në një kontekst të qartë, kur ai e përshkruan rrugën se si mund të bëhesh anëtar i BE-së apo se si dështon në atë rrugëtim.
“Nuk e shoh se si bëhesh anëtar i BE-së, pa bashkërendim nga BE-ja. Dhe kjo nënkupton bashkërendim nga shtetet anëtare të BE-së. Nuk e shoh si bëhesh anëtar i plotë i NATO-s, pa bashkërendim nga të gjithë anëtarët e NATO-s. Siç e dini, disa nga ato shtete vetë nuk e kanë pranuar zyrtarisht realitetin e Kosovës si shtet sovran, demokratik dhe multietnik, siç e kemi pranuar ne.
Duhet t’i bindni, duam të ndihmojmë. Kjo nënkupton, duke punuar në procesin e vendosur nga institucione të caktuara”, është shprehur ai në Samit.
Hovenier është njohur në të kaluarën si njëri nga diplomatët e “klubit” që mbështeste rrugën e pavarësimit të Kosovës!
