Kuvendi i Kosovës do të zhvillojë procedurë të re për përzgjedhjen e logos së këtij institucioni, pasi logoja e përzgjedhur doli se kishte ngjashmëri me një logo tjetër.
Kuvendi ka njoftuar se është anuluar logoja e përzgjedhur së fundi për Kuvendin e Kosovës pas kritikave për ngjashmëri me një logo të një kompanie planifikuese ekspozitash në Riad të Arabisë Saudite.
Në njoftim thuhet se në mbledhjen e kryesisë së mbajtur më 23 shtator është trajtuar kjo çështje dhe është konstatuar se logoja e Kuvendit nuk duhet të ketë ngjashmëri me ndonjë logo tjetër.
“Pas njoftimit që kemi pranuar se ka pasur reagime nga persona të fushës së dizajnit apo mediatike, Kryesia e Kuvendit të Kosovës, në mbledhjen e rregullt të mbajtur më 23.09.2024 e ka trajtuar çështjen e logos së Kuvendit dhe ka konstatuar se e njëjta nuk duhet të këtë ngjashmëri me ndonjë logo tjetër, pavarësisht se logoja e përzgjedhur nga Juria profesionale nuk ka qenë identike me logon më të cilën është krahasuar. Përfaqësues të Kuvendit janë takuar edhe me operatorin ekonomik fitues dhe është konstatuar se logoja e përzgjedhur ka ngjashmëri me logon e krahasuar, pavarësisht se nuk janë identike”, thuhet në njoftimin e Kuvendit.
Të dy palët janë pajtuar që Kuvendi duhet të ketë logo që nuk ngjashmëri me asnjë logo tjetër.
Po ashtu janë pajtuar që mjetet financiare të kthehen.
“Ndërsa, pas një takimi ndërmjet përfaqësuesve të Kuvendit dhe operatorit ekonomik fitues, është konstatuar se logoja e përzgjedhur ka ngjashmëri me logon e krahasuar, pavarësisht se nuk janë identike. Të dy palët u pajtuan që Kuvendi i Kosovës duhet të këtë logo e cila nuk ka ngjashmëri me asnjë logo tjetër. E zyrtarisht u pajtua që të kthej mjetet financiare të pranuara nga Kuvendi, si dhe ka kërkuar që të kthej në pronësi të saj të drejtën e autorit të logos së propozuar.” /Kosovatimes/
