Organizata jo qeveritare për Marrëveshje të Tregtisë së Lirë të Evropës Qendrore (CEFTA) përmes një komunikate për ka bërë të ditur se ministrat e ekonomisë janë mbledhur në Berlin për të shënuar dhjetëvjetorin e Procesit të Berlinit dhe për të vendosur agjendën e ardhshme.
Në komunikatë thuhet se pjesëmarrësit janë përqendruar në vlerësimin e progresit drejt krijimit të Tregut të Përbashkët Rajonal (CRM). jithashtu, mundësitë ekonomike të rajonit, ishin në qendër të diskutimeve, së bashku me dhjetë marrëveshje të rëndësishme të lehtësimit të tregtisë së CEFTA-s që janë në pritje të miratimit.
Sipas komunikatës drejtoresha në detyrë e Sekretariatit të CEFTA-s, Danijela Gaceviq, që ka marrë pjesë në Konferencën e organizuar nga Ministri Federal i Çështjeve Ekonomike dhe Veprimit Klimatik, Robert Habeck, ka theksuar rëndësinë e vendimeve për arritjen e lirisë së plotë të lëvizjes së mallrave dhe shërbimeve.
“Miratimi i këtyre marrëveshjeve do të jetë një hap i rëndësishëm drejt një Tregu të Përbashkët Rajonal në përputhje me BE-në. Secila prej tyre është një paketë përfitimesh për bizneset dhe konsumatorët që do të na afrojë, jo vetëm me njëri-tjetrin, por edhe me BE-në. Prandaj, është thelbësore që t’i miratojmë sa më shpejt”, ka thënë Gaceviq.
Në komunikatë fhuhet se marrëveshjet në kuadër të CEFTA-s miratohen nga Komiteti i Përbashkët në formën e Vendimeve, Protokolleve Shtesë ose Rekomandimeve. Aktualisht, dhjetë marrëveshje të tilla janë në pritje të miratimit në fusha të ndryshme: tregtia elektronike, shërbimet e shpërndarjes së pakove, parandalimi i bllokimit të pajustifikuar gjeografik, kualifikimet profesionale, pronësia intelektuale, menaxhimi i rrezikut, shërbimet e agjencive të udhëtimit, sigurimi i motorëve, njohja e operatorëve ekonomikë të autorizuar dhe zgjidhja e mosmarrëveshjeve tregtare.
