Një gjykatë në Poloni dënoi me burgim dy persona, shtetas të Ukrainës dhe Bjellorusisë, me akuzën e spiunimit për Rusinë, njoftoi të enjten agjencia polake e lajmeve PAP.
Siç u përmend, këta dy të pandehur ishin në mesin e 16 shtetasve të Bjellorusisë, Ukrainës dhe Rusisë të arrestuar me vendim të Agjencisë Polake të Sigurisë së Brendshme, si pjesë e një hetimi mbi aktivitetet e një rrjeti spiunazhi, detyrat e të cilit përfshinin mbledhjen e informacionit për transportin e pajisjeve ushtarake në Ukrainë. .
Varshava thekson se roli i Polonisë në mbështetjen e Kievit e ka bërë atë një objektiv kyç për spiunazhin dhe sabotazhin rus.
Një gjykatë në qytetin polak të Lublinit dënoi 23-vjeçarin ukrainas Maxim L. me gjashtë vjet burg dhe një gjobë prej rreth 4000 dollarë për pjesëmarrje në një grup të organizuar përgjegjës për krime kundër shtetit polak, spiunazh dhe posedim kanabis.
30-vjeçari bjellorus Vladislav P. mori 2 vjet e 10 muaj burg, si dhe gjobë për pjesëmarrje në grup kriminal dhe spiunazh.
Gjyqtari Miroslav Brzozowski tha gjatë gjyqit se pjesëmarrja e të pandehurve në një grup kriminal është pa dyshim. Gjyqtari vuri në dukje se krimet janë kryer për përfitime financiare.
Pjesa tjetër e të arrestuarve në këtë hetim morën dënime nga 13 muaj deri në gjashtë vjet burg, sipas PAP. Maxim L. dhe Vladislav P. kanë të drejtë të apelojnë vendimin.
