Organizata “EcoKosWomen” ka organizuar një ngjarje vetëdijesuese për rolin e grave në shoqëri, duke nxitur ndryshime pozitive që kontribuojnë në fuqizimin ekonomik të grave, dhe njëkohësisht avancojnë barazinë gjinore në Kosovë.
Shpresa Gosalci nga Organizata “EcoKosWomen”, ka theksuar se temat kryesore që po promovojnë përmes kësaj iniciative janë fuqizimi i grave ne bujqësi dhe roli i tyre në vendimmarrje.
“Përmes mesazheve dhe aktiviteteve që përçojmë në këtë fushatë, dëshirojmë të theksojmë rolin a pazëvendësueshëm që luajnë gratë në zhvillimin e shoqërisë sonë. Duke përkrahur fuqizimin ekonomik të grave dhe avancimin e barazisë gjinore, ne jo vetëm që po krijojmë mundësi për gratë të shprehin potencialin e tyre, por po ndërtojmë një të ardhme me të sigurt dhe më të drejtë për të gjithë”, ka thënë ajo. Sipas saj, gratë, kudo që janë, meritojnë mundësi të barabarta.
Sekretarja e përgjithshme e Ministrisë së Bujqësisë, Venera Çerkini ka thënë se gratë në Kosovë kanë pasur përparim dhe avancim në të drejtat e tyre.
“Ne jemi shumë të përkushtuar në fushën e bujqësisë, 5 mijë gra kanë përfituar nga ministria jonë. Kjo tregon një përparim të gruas që kem një kontribut të çmuar në fushën e bujqësisë. Mbështetja e grave është për një të ardhme të që qëndrueshme”, ka thënë ajo.
Gerhard Schaumberger, Drejtor i Caritasit Zviceran në Kosovë, ka potencuar se kjo fushatë krijon mundësinë e gjithëpërfshirjes dhe fuqizimin e grave.
