Shefi i Grupit Parlamentar të AAK-së, Besnik Tahiri ka folur për ushtruesit e detyrës që bartin pozita në institucionet e vendit, duke shprehur shqetësimin e tij se po shkelet Ligji për zyrtarë publik. Ai ka thënë se bazuar në Ligjin për zyrtarë publikë, vendimet që i marrin personat zyrtarë që janë ushtrues detyre mund të kontestohen nga institucionet juridike dhe të konsiderohen joligjore.
Në një konferencë për media, Besnik Tahiri ka theksuar se mbajtja e këtyre pozita me zëvendësues është në kundërshtim me Ligjin për zyrtarët publik, i cili ka hyrë në fuqi tash e një vit.
“Kohëzgjatja e funksionin është e kufizuar me këtë ligj dhe nuk ekziston mundësia me një akt ligjor që të zgjatet mandati. Andaj, rrezikohemi që të gjitha vendimet që nënshkruhen nga UD mund të bien në kundërshtim dhe mund të mos prodhojnë efekt juridik. Unë nuk kam asgjë për emrat e përveçëm të cilët bartin ushtrues detyre por kjo praktikë në këtë mandat, është duke shkatërruar shërbimin civil dhe duke i bërë dëm Administratës Shtetërore dhe duke vë në pikëpyetje këto nënshkrime”, ka deklaruar Tahiri.
Sipas tij, tejkalimi i këtij afati përveç që është paligjshmëri në vetvete, prodhon edhe një pasojë tjetër juridike që është shpallja e paligjshme e çdo vendimi të marrë nga U.D, pas kalimit të afatit 1 vjeçar siç përcaktohet në ligj. /Kosovatimes/
