Në fabrikën e Tesla në Grünheide të Gjermanisë, jo shumë larg Berlinit, filloi praktika e vizitës së punonjësve në pushim mjekësor për të kontrolluar shëndetin e tyre , gjë që shkaktoi një stuhi reagimesh. Ndërsa menaxhmenti i mbron këto lëvizje, sindikata e punëtorëve të metaleve IG Metall kritikon ashpër veprime të tilla si presion të papranueshëm ndaj punëtorëve.
Gjegjësisht, në Gjermani punëtorët që janë në pushim mjekësor ende marrin pagë, dhe aftësinë e tyre për të punuar e vendosin mjekët. Megjithatë, Tesla nuk pajtohet plotësisht me këtë sistem. Sipas deklaratave të menaxherit të Tesla, André Thierig , vizitat në shtëpi të punonjësve nuk janë një praktikë e pazakontë dhe kryhen për shkak se një numër i madh i punëtorëve janë në pushim mjekësor, veçanërisht gjatë muajve të verës. “Nuk është asgjë e pazakontë,” tha Thierig, duke shtuar se procedura të ngjashme kryhen nga “shumë kompani të tjera”. Ai shpjegoi se nuk bëhet fjalë për kontroll të të sëmurëve, por për “vizita në shtëpi të personave që janë në pushim mjekësor” për të ndikuar në “moralin e punës së punonjësve”.
Sipas të dhënave të Tesla, më shumë se 15 për qind e punonjësve ishin në pushim mjekësor nganjëherë. Thierig theksoi se gjatë këtij viti janë identifikuar më shumë se 200 punëtorë të cilët në vazhdimësi kanë dorëzuar certifikatat e pushimit mjekësor pa punuar fare. “Kemi përzgjedhur rreth njëzet raste për vizita të paparalajmëruara. Shumica e këtyre punëtorëve nuk ishin në shtëpi dhe disa treguan sjellje shumë agresive”, tha Thierig.
Sindikatat u tronditën
Megjithatë, sindikata e punëtorëve të metaleve IG Metall nuk e ndan interpretimin e Teslës. Përfaqësuesit e sindikatës i quajnë vizita të tilla si “veprime të papranueshme” dhe besojnë se ato janë rezultat i ngarkesës së tepërt në fabrikë, gjë që çon në rritjen e shkallës së pushimeve mjekësore. Dirk Schulze , kreu i sindikatës për rajonet e Berlinit, Brandenburgut dhe Saksonisë, dënoi ashpër praktikën e Teslës. “Punonjësit nga pothuajse çdo pjesë e uzinës po flasin për një ngarkesë jashtëzakonisht të madhe pune,” tha Schulze. “Nëse ka mungesë të personelit, u bëhet presion punëtorëve të sëmurë, të shëndoshët mbingarkohen me punë shtesë. Nëse menaxhmenti i kompanisë dëshiron vërtet të zvogëlojë numrin e ditëve të sëmundjes, duhet ta thyejë këtë rreth vicioz”.
Thierig, nga ana tjetër, hedh poshtë pretendimet se kushtet e punës janë shkaku i pushimit mjekësor. “Të premteve dhe në turne të vona kemi regjistruar rreth pesë për qind më shumë punëtorë në pushim mjekësor se në ditët tjera, që nuk mund të jetë tregues i kushteve të këqija të punës sepse kushtet janë të njëjta çdo ditë dhe në të gjitha turnet. Kjo sugjeron që sistemi social gjerman ndonjëherë shfrytëzohet”, tha Thierig, duke theksuar se Tesla punëson më shumë se 1500 punëtorë të përkohshëm dhe se shkalla e tyre e pushimit mjekësor është vetëm dy për qind.
Megjithëse vizitat në shtëpi kanë tërhequr kritika, Thierig pretendon se zbatimi i tyre ka dhënë rezultate. “Ne kemi parë një efekt përmirësimi”, tha ai, duke theksuar se numri i ditëve të sëmundjes është ulur që nga fillimi i vizitave. Megjithatë, ai nuk përjashtoi mundësinë që një praktikë e tillë të vazhdojë. “Ne donim të kishim një dialog me kolegët tanë dhe të dinim se çfarë po ndodhte me ta. Një vizitë personale ka një efekt ndryshe nga një telefonatë”, theksoi ai.
