Sulmet izraelite në Liban kanë vrarë qindra njerëz ditët e fundit dhe kanë nxitur frikën e një lufte gjithëpërfshirëse rajonale.
Qeveria kanadeze po rezervon vende në fluturimet komerciale për të ndihmuar qytetarët e saj të largohen nga Libani.
Presidenti i SHBA Joe Biden ka urdhëruar Pentagonin të “vlerësojë dhe rregullojë qëndrimin e forcave amerikane sipas nevojës” në Lindjen e Mesme, tha dje Shtëpia e Bardhë, pas sulmeve izraelite në Bejrut që Izraeli tha se kishin në shënjestër militantët libanezë të Hezbollahut.
Sulmet izraelite në Liban kanë vrarë qindra njerëz ditët e fundit dhe kanë nxitur frikën e një lufte gjithëpërfshirëse rajonale. Uashingtoni ka mbajtur mbështetje të fortë ushtarake për aleatin e tij, ndërsa pa sukses ka bërë thirrje për një armëpushim në Gaza dhe Liban.
“Biden urdhëroi Pentagonin të vlerësojë dhe të rregullojë sipas nevojës qëndrimin e forcave amerikane në rajon për të përmirësuar parandalimin, për të siguruar mbrojtjen e forcës dhe për të mbështetur një sërë objektivash të SHBA. Ai gjithashtu udhëzoi ekipin e tij që të sigurojë që ambasadat e SHBA në rajon të marrin të gjitha të përshtatshmet masat mbrojtëse”, tha Shtëpia e Bardhë.
Disa shpërthime u dëgjuan në Bejrut pak pas mesnate, raportoi një dëshmitar i Reuters, ndërsa ushtria izraelite tha se po sulmonte armët që i përkisnin Hezbollahut në periferitë jugore të qytetit. Një burim i Reuters i afërt me grupin e armatosur libanez tha se shefi i Hezbollahut, Sayyed Hassan Nasrallah ishte i padisponueshëm pas sulmeve izraelite në periferitë jugore të Bejrutit mbrëmë.
Disa orë pas sulmit, Hezbollahu nuk komentoi për fatin e tij. Një burim i afërt me Hezbollahun i tha Reuters se Nasrallah ishte gjallë dhe agjencia iraniane e lajmeve Tasnim gjithashtu raportoi se ai ishte i sigurt. Një zyrtar i lartë i sigurisë iranian i tha Reuters se Teherani po kontrollonte statusin e tij.
