Ish-ministrja e Financave, Hykmete Bajrami, ka reaguar ashpër ndaj akuzave të fundit nga deputeti i VV-së, Salih Zyba, duke kërkuar publikisht që ai të paraqesë faktet për akuzat e korrupsionit dhe përfitimeve të jashtëligjshme.
Në një postim të gjatë, Bajrami e ka sfiduar Zyba-n të publikojë emrat dhe transaksionet, duke përmendur rastin e transaksioneve të publikuara nga mediat për Martin Berishajn si shembull i transparencës së kërkuar.
“Ku janë faktet, Salih? Kush po përfiton dhe prej kujt po përfiton?” ka pyetur Bajrami, duke theksuar se gjatë mandatit të saj në tri ministri të ndryshme, përfshirë Ministrinë e Financave, të Arsimit dhe të Tregtisë, asnjëherë nuk ka pasur ndonjë zyrtar që të ketë deklaruar se ajo ka shkelur ligjin.
Ajo përmendi se në këto ministri aktualisht janë punësuar mijëra njerëz dhe se akuzat që po i bëhen janë të pabaza dhe të motivuara politikisht.
Bajrami akuzoi qeverinë aktuale për përpjekje për të mbuluar korrupsionin e tyre me shpifje dhe propagandë, duke shtuar se, pavarësisht tri viteve e gjysmë hetimesh, nuk është gjetur asgjë kundër saj.
“Turp të keni,” tha Bajrami duke e quajtur këtë një përpjekje të ulët për të mbajtur larg vëmendjen nga dështimet e qeverisë.
Ajo paralajmëroi se drejtësia do të marrë masa kundër atyre që kanë përfituar në mënyrë të jashtëligjshme.
“Nëse kemi vetëm tre prokurorë që ia duan të mirën këtij vendi, ju do të përfundoni në burg një nga një,” tha ajo, duke përmendur shprehjen se “drejtësia vonon, por nuk harron.”
Bajrami gjithashtu citoi një thënie të Zyba-së nga viti 2019, “hajnat në burg”, duke e përmbysur atë si një paralajmërim që do të prekë ata që sot janë në pushtet.
Kjo përplasje e fundit mes Bajramit dhe Zybës pritet të nxisë debat edhe më të ashpër në skenën politike, me të dy palët që kërkojnë transparencë dhe llogaridhënie për akuzat e korrupsionit dhe përfitimeve të dyshimta. /Kosovatimes/
