Ka ndërruar jetë, në moshën 84 vjeçare, profesori Liman Rushiti, punonjës shumëvjeçarë në Institutin e Historisë “Ali Hadri” në Prishtinë.
Lajmin për vdekjen e profesor Rushitit e kanë bërë të ditur familjar të të ndjerit si dhe Instituti i Historisë “Ali Hadri” në Prishtinë.
“Me ndarjen nga jeta të profesor Limanit, Instituti humbi kolegun dhe punonjësin shkencorë i cili për dekada të tëra kontribuoi në ndriçimin e ngjarjeve dhe personaliteteve të rëndësishme nga historia e popullit shqiptar, duke dhënë kontribut të çmueshëm në historiografinë shqiptare. Profesor Limani do të kujtohet dhe mbahet mend për kontributin e tij në studimin e Lëvizjes Kaçake në Kosovë”, thuhet në njoftimin e këtij instituti.
Prof. Dr. Liman Rushiti u lind më 25 qershor 1942 në fshatin Sazli të komunës së Ferizajt. Shkollën fillore dhe të mesme ekonomike, i kreu në Ferizaj.
Nga 1 dhjetori i vitit 1967 deri në vitin 2007, profesor Limani ka punuar në Institutin e Historisë në Prishtinë. Ka hartuar shumë recensione, disa monografi e punime shkencore dhe tekste shkollore.
Profesori, Liman Rushiti, ka dhënë kontribut të çmuar edhe në revistën shkencore “Kosova”.
Familjarët njoftojnë se ceremonia e varrimit do të mbahet të mërkurën në fshatin e lindjes, Sazli (lagjia Ratkocer), komuna e Ferizajt, në orën 15:30. /Kosovatimes/
