Projektin e pikës turistike të Nashecit e përcjellin disa probleme. Drejtoria e Turizmit kishte menduar ta përfundonte në fund të shtatorit, por problemet që dolën gjatë kryerjes së punimeve dhe dëmet që u bënë pa dashje nga operatori ekonomik, kanë bërë që projekti të shtyhet deri në një afat tjetër, thonë zyrtarë të Drejtorisë së Turizmit në Prizren.
Projekti i pikës turistike të Nashecit assesi nuk po merr rrugën e duhur të realizimit, për t`ua kthyer në shfrytëzim banorëve të kësaj zone dhe pushuesve që e shfrytëzojnë atë. Që disa herë janë ndërprerë punimet, ndërsa banorët i kanë humbur shpresat e jetësimit të tij për një kohë relativisht të gjatë.
“Janë ndërprerë sepse e kanë dëmtu ujin, ne veç i kemi tregu që nuk bën me shku në atë vend aty, por sa më larg me punu. Qe urën e kanë ba, qe dy tre herë janë duke i ndërprerë punimet, kemi pritë me përfundu në korrik, por por jo. S’besoj që do të përfundojë hiç”, tha Ismet Hodaj Banor i Nashecit.
Ndërsa një qytetar tjetër tregoi se nga punimet janë shkaktuar shumë dëme në ujëmbledhës e në pompat e ujit.
Këto dëme që u shkaktuan në ujëmbledhësin e Nashecit, i kushtuan Hidroregjionit Jugor shumë shtrenjtë. Në muajt më të nxehtë ngelën pa ujë e me reduktime të gjata 14 fshatra.
Investimet emergjente i përfunduam me procedura të përshpejtuara, thotë drejtori teknik i kësaj kompanie Besar Grazhda, por tani duhen edhe 55 mijë euro shtesë deri në përfundimin e tij, të cilin jemi duke e bërë me drejtorinë e shërbimeve publike, por koha duhet të jetë e favorshme, shtoi ai.
“Produktet të cilat do të përdoren janë argjilë dhe zhavor. Argjila në kushte të lagështisë dhe të reshjeve nuk mund të përdoret dhe ëprdorimi i saj është i vështirë. Duhet të përdoren teknika të ndryshme të cilat ne nuk i posedojmë, gjithashtu edhe operatori ekonomik i angazhuar nga komuna nuk ka ndonjë eksperiencë shumë të madhe në këtë drejtim, për këtë arsye preferohet që në mot të mirë të zhvillohen këto punime”, tha Grazhda.
E drejtoria e turizmit në një përgjigje elektronike ka sqaruar se:
“Punimet në fshatin Nashec rreth investimeve infrastrukturore të cilat janë paraparë të kryhen në fund të këtij muaji, nuk janë përfunduar për shkak të pengesave të cilat janë shfaqur dhe nuk i adresohen drejtorisë sonë, por Hidroregjionit Jugor. Jemi duke pritur përfundimin e punimeve nga Hidroregjioni dhe më pas do të vazhdohet përfundimi i projektit”, thuhet në përgjigjen e tyre.
