Udhëheqësi suprem i Iranit Ayatollah Ali Khamenei dha urdhrin për lëshimin e raketave në Izrael, tha një zyrtar i lartë iranian për Reuters pasi Irani kreu një sulm me raketa ndaj Izraelit.
Zyrtari shtoi se Teherani është “plotësisht i përgatitur për çdo hakmarrje”. Khamenei mbetet në një vend të sigurt pasi Teherani gjuajti raketa në Izrael, tha një zyrtar iranian i paidentifikuar.
Khamenei u zhvendos në një vend të sigurt pasi Izraeli vrau aleatin e ngushtë iranian, udhëheqësin e Hezbollahut, Hassan Nasrallah javën e kaluar.
Garda Revolucionare e Iranit njoftoi këtë mbrëmje se kishte lëshuar dhjetëra raketa në Izrael. Garda deklaroi se Izraeli do ta gjente sërish veten objektiv sulmi nëse do të përgjigjej.
Hedhja e raketës u tha se ishte në përgjigje të vrasjes së liderit politik të Hamasit, Ismail Haniyeh, liderit të Hezbollahut, Hassan Nasrallah dhe zëvendës komandantit të operacioneve të Korpusit të Gardës Revolucionare iraniane, Abbas Nilforoushan.
