Ministria e Punëve të Brendshme ka mbajtur takimin e Bordit të Përbashkët të Projektit, “Qasja e Integruar Institucionale dhe Forcimi i Bashkëpunimit Ndërkufitar për Kontrollin e Armëve të Vogla dhe të Lehta mes delegacioneve të Republikës së Kosovës dhe Republikës së Shqipërisë.
Sipas Ministrisë të Punëve të Brendshme, gjatë këtij takimi u diskutua për rezultatet e arritura deri më tani, sfidat dhe hapat e mëtutjeshëm në qëllimin e reduktimit të keqpërdorimit të AVLE-ve në përgjithësi tek të dy shtetet si dhe bashkëpunimin reciprok në këtë fushë.
Delegacionet u kryesuan nga zëvendësministri i Ministrisë së Punëve të Brendshme, Blerim Gashani dhe zëvendësministri i Ministrisë së Brendshme, Besfort Lamallari, njëkohësisht koordinatorë të komisioneve përkatëse për zbatimin e Udhërrëfyesit Rajonal të AVLE.
“Të dy zëvendësministrat e vlerësuan lartë punën e deritanishme në këtë projekt dhe shprehën mbështetjen e tyre për projektin dhe zgjerimin e tij edhe më tutje në këtë drejtim. Ky projekt po mbështet nga qeveria e Gjermanisë, e Suedisë, e Holandës, e Francës, e Mbretërisë së Bashkuar, e Norvegjisë dhe Bashkimit Evropian. Takimi u organizua nga UNDP-Kosovë”, njofton MPB. /Kosovatimes/
