Shkruan: Shenoll MUHARrEMI
Kosova po zgjohet nga gjumi i dekadave të fundit ku kishte një pozitë të privilegjuar në komunitetin perëndimor. Këto dekada të ‘mjaltit’ kanë përfunduar tashmë. Fillimisht përtej Atlantikut ndryshuan gjërat. Një herë ishte një emisar që vepronte ndryshe, pastaj edhe tjetri dhe e kuptuam që është mbase një politikë zyrtare tashmë.
Ne duhet vetëm vetën të pyesim se pse ndodhi kjo, çfarë ne bëmë ndryshe apo ku gabuam. Mendimi im ‘naiv’ është që baza e ndryshimit vjen te lobimi. Qeveria nuk vazhdoj me investua në lobim i cili i hap secilën derë në një ShBA korporative ku gjithçka vendosë sektori privat ndoshta. Kursimi i disa milionëve (POLITIKAT E MAJTA!) nga qeveria si dhe investimi dramatik i Serbisë bëri që për disa vite pozicioni i Kosovës të zbehet e i Serbisë të përmirësohet. Por kjo, sikurse ishte e ‘izoluar’ dhe e përkohshme.
Pastaj, edhe disa vend në Evropë me ndikim, sikurse Franca filluan të mësojnë nga situata e re e krijuar në Washinton rreth Kosovës dhe filluan me i u adaptua pozicionet. Kështu, pozicioni i Kosovës kur ndryshoi në boshtin kryesor, në DC, pastaj si me domino efekt u shkapërderdh në Evropë, sidomos në Bruksel.
E tash së fundi, sidomos pas vizitës së Kancelarit Scholtz në Beograd dhe dakordimit rreth Lithiumit edhe personat sikur zotëri Sarrazin, sikurse kanë ndryshuar pozicionet. Në diskursin e tyre shihet një gjuhë dhe pozicione dramatikisht të ndryshme krahasuar me ato më herët.
Tash Gjermani kërkon të largohen masat ndaj Serbisë agresive se interesi i Gjermanisë po kërcënohet. Ky është kulmi. Edhe pas sulmit të Banjskës, Kosova si viktimë, po sakrifikohet. Kjo tregon për gabimet dhe mjerimin e jashtëzakonshëm të diplomacisë së Kosovës. Dëmet e krijuara nga diplomacia e Qeverisë Kurti II do të duhet vite e dekada të rikuperohen, dhe kjo nuk dmth që mund të arrihen rezultate.
E tash Kosova po zgjohet nga gjumi i saj. Nga një ëndërr e jashtëzakonshme pozitive ku pati status të privilegjuar me dekada. Tash rruga e Kosovës do të jetë më e vështirë. Kosova e cila priste shumicën e punëve të i bëjnë tjerët për të, tash duhet të i bëjë vet. Por jo vetëm këtë, ajo duhet të bëjë shumë kompromise të dhimbshme se izolimi i saj nënkupton licencë për politikën e Serbisë rreth Kosovës.
Këtë mund ta quajmë ‘Sarrazinizmi’, kur emisari special i Gjermanisë, një mik i jashtëzakonshëm i Kosovës, tash është shndërruar në një person që po bënë presion mbi qeverinë e Kosovës ngjashëm sikur disa emisarë të ShBA që kishin një qasje tepër biznesore dhe jodiplomatike. Kjo shënon dhe konfirmon kohën dhe faktin që tash gjërat kanë ndryshuar dramatikisht dhe Kosova duhet të mësojë shumë, të adaptohet dhe të rishikoj strategjinë e diplomacisë së saj.
