Shkruan: Hyzri SALIHU, ekspert i sigurisë
Kaosi global që lëkund rendin botëror
Analiza mbi situatën gjeopolitike dhe gjeostrategjike në botë sjell një sfond të zymtë për shkak të vatrave të luftës, të cilat veç e veç dhe të marra të gjitha së bashku po e hedhin gradualisht njerëzimin në zjarr.
Në studimet tona i referohemi përvojave të Luftës së Dytë Botërore, duke harruar se ajo tashmë është e largët dhe një erë luftë e re ka filluar duke trazuar mendimet e Njerëzimit për një Luftë të Tretë Botërore.
Në marrëdhëniet ndërkombëtare ka kohë që ekuivalencat kanë ndryshuar duke evidentuar aktorët e rinj, të cilët kërkojnë karrigen e tyre në tryezën e interesave shtetërore e globale.
Konflikti në botë që ka marrë me kohë natyrën e Luftës së Tretë Botërore po synon të ndryshojë rendin botëror dhe të rrëzojë rolin e lidershipit amerikan në drejtimin e botës.
Kjo luftë tashmë është më afër sesa njerëzimi e mendon dhe ai është përfshirë në pavetëdije brenda saj.
Një arsye më shumë pse shtetet dhe faktori shqiptar në Ballkan duhet t’i drejtohen vullnetit të tyre politik kombëtar për të marrë në dorë fatin e jetës dhe pasurisë së popullit.
Kërcënimet dhe rreziqet që shfaqen në rajonin e Ballkanit Perëndimor janë reale, të egra,
shkatërruese sipas një lloji të ri lufte pa formë dhe pa front, të cilat synojnë nëpërkëmbjen dhe shkatërrimin e qëndresës së mbijetesës kombëtare.
Me ose pa dashje jemi bërë pjesë e kësaj ngatërrese të madhe globale dhe me mençuri duhet të gjejmë rrugë zgjidhjet për të forcuar sigurinë kombëtare, paqen dhe stabilitetin në territoret shqiptare dhe në rajon.
Institucionet demokratike shqiptare të mbështetura nga akademizmi, inteligjenca, patriotizmi dhe aleanca qytetare në bashkërendim me aleatët strategjikë në fushën e sigurisë, duhet të bëjnë detyrën ndaj interesave kombëtare.
Sjellja e një përmbledhje të tillë të situatës globale dhe Praglufta e Tretë Botërore tërheq vëmendjen për vonesën në kohë për të konsoliduar elementët jetikë
të Sigurisë Kombëtare.
