Udhëheqësi suprem i Iranit, Ayatollah Ali Khamenei , së fundmi shprehu shqetësimin për infiltrimin izraelit brenda Hezbollahut libanez, pasi udhëheqësi i kësaj organizate, Hassan Nasrallah , u vra në një sulm izraelit – raporton Reuters . Sipas informacioneve nga burime iraniane, Khamenei paralajmëroi Nasrallah që të largohej nga territori libanez disa ditë para vrasjes së tij, duke cituar raportet e inteligjencës që sugjeronin se Izraeli po planifikonte ta vriste atë.
Një zyrtar i lartë iranian, i cili foli në kushte anonimiteti, zbuloi se Khamenei e dërgoi mesazhin përmes gjeneralit Abbas Nilforoushan , një komandant i lartë i Gardës Revolucionare të Iranit, i cili ishte me Nasrallah në kohën e sulmit.
Në përgjigje të vdekjes së Nasrallah, Khamenei urdhëroi lëshimin e rreth 200 raketave në objektivat izraelite . Izraeli, nga ana tjetër, filloi një sulm tokësor “të kufizuar” kundër Hezbollahut në Libanin jugor, ndërsa ministria e jashtme e Iranit nuk pranoi të komentojë situatën.
Burimet konfirmuan gjithashtu se seria e fundit e sulmeve izraelite shkatërruan vendndodhjet kryesore të armëve të Hezbollahut dhe eliminuan një pjesë të stafit drejtues të tij – raporton The Times of Israel . Frika po rritet në Iran për infiltrimin e mundshëm të operativëve izraelitë brenda Hezbollahut, gjë që vë në pikëpyetje besimin midis organizatës dhe establishmentit iranian.
Humbje besimi
Pas vrasjes së Nasrallahut, autoritetet iraniane nisën hetime të gjera për të zbuluar infiltrim të mundshëm brenda radhëve të tyre. Vëmendje e veçantë iu kushtua anëtarëve të Gardës Revolucionare që udhëtuan për në Liban.
Sipas informacioneve nga qarqet e inteligjencës iraniane, disa persona u arrestuan nën dyshimin për bashkëpunim me Izraelin . “Besimi që mbante gjithçka së bashku është zhdukur,” tha një zyrtar, duke theksuar se Khamenei nuk i beson më askujt.
Sipas ekspertëve, kjo është një humbje që i ka shkaktuar dëme të konsiderueshme Iranit, duke ulur aftësinë e tij për të kryer operacione në kufijtë e Izraelit. “Irani ka humbur investimin më të madh që ka pasur në dekadat e fundit,” tha Magnus Ranstorp , një ekspert për Hezbollahun.
Pas atentatit, Hezbollahu nisi hetimet e veta, duke marrë në pyetje anëtarët e organizatës së tij nën dyshimin për spiunazh. Në një nivel të lartë, udhëheqja e Hezbollahut po diskuton mënyrat për të parandaluar sulme të mëtejshme, duke marrë parasysh situatën në të cilën gjenden pas vdekjes së liderëve kryesorë.
