Komisioni Hetimor Parlamentar është duke intervistuar ish-ministrat e Arsimit dhe të Financave, për procesin e subvencionimit të blerjes së teksteve dhe të mjeteve mësimore.
Hoxhaj: Sot duhet debatuar se si mjetet shkollore t’i përgjigjen teknologjisë
Ish-ministri i Arsimit, Enver Hoxhaj, ka thënë se debati i sotshëm për tekstet shkollore duhet të bëhet në aso forme që ato të jenë në përputhje me teknologjinë.
“Debatin rreth teksteve shkollore do të duhej ta kthenim në atë a duhet të ketë në 2024 tekste shkollore, sikurse i kemi në Republikën e Kosovës ose si të ketë libra elektronike, smart boards dhe se si mjetet shkollore t’i përgjigjen teknologjisë, nxënësve dhe dijes”, ka thënë ai.
Hoxhaj teksa ka folur për procedurat e subvencionimit me tekste shkollore gjatë mandatit të tij, ka thënë se nuk ka ekzistuar fenomeni i krijimit të stoqeve nga teprica e teksteve shkollore, të cilat nuk kanë qenë në proporcion me numrin e nxënësve.
“Ka pasur një traditë që kanë qenë dy shtëpi botuese të cilat kanë ofruar tekste shkollore në përputhje me plan programet”, ka thënë ai.
Bytyçi: Ne kemi bërë blerje e jo subvencionim të librave
Ish-ministri i Arsimit, Shyqyri Bytyçi ka folur për procedurat e atëhershme të furnizimit me tekste shkollore, e cila ka qenë si praktikë që ka funksionuar nëpërmjet blerjes së tyre nga MAShTI.
“Ne kemi bërë blerje e jo subvencionim të librave. Si procedura nëse flasim, është formuar gjithmonë komisioni, i cili paraprakisht ka marrë informacione nga drejtoritë komunale të arsimit për numrin e saktë të nxënësve nëpër shkolla”, ka thënë ai.
Ai ka thënë se janë ftuar dy shtëpitë botuese të certifikuara dhe është negociuar për blerjen e teksteve shkollore.
Polemika gjatë intervistimit të Bajramit për subvencionimin e teksteve
E para e intervistuar ka qenë ish-ministrja e Financave dhe MASHT, Hykmete Bajrami, e cila tha se në udhëheqje ka qëndruar për katër muaj, andaj siç u shpreh ajo, kur ka marrë detyrën nxënësit vetëm se kanë qenë të furnizuar me tekste shkollore.
“Ftesën e kam pasur për të raportuar në cilësinë e ish-ministres së Arsimit. Sa i përket planifikimit, planifikimin e buxhetit për libra nuk e bënë Ministria e Financave. Brenda kufijve buxhetor ministri i Arsimit e bënë planifikimin. Unë nxënësit i kam gjetur të furnizuar me libra. Pastaj mandatin e ka marrë një ministër tjetër. Unë e di se librat janë shpërndarë me kohë për vitin 2020-2021”, deklaroi ajo.
Ajo ka liruar sallën e komisionit pas polemikave me deputetet që shtronin pyetje. Në listë të intervistimit janë edhe Ramë Likaj, Shyqyri Bytyçi, Arsim Bajrami, Ramë Buja, Enver Hoxhaj, Bedri Hamza, Besim Beqaj dhe Avdullah Hoti.
