Presidenti i Federatës së Futbollit të Kosovës (FFK) Agim Ademi, në një intervistë për emisionin sportiv ‘AS’ në RTK, ka diskutuar për ngjarjet e fundit në futbollin kosovar. Ai ka theksuar rëndësinë e Komitetit Hat-trick, i cili në vitin 2025 do të mbahet në Kosovë, dhe përfitimet që ky event do t’i sjellë vendit, duke ndihmuar në përmirësimin e infrastrukturës së futbollit.
Ademi foli për arritjet e FFK-së në ndërtimin e fushave dhe përfundimin e Kampit Nacional të Futbollit. Ai vuri në dukje se deri më tani, FFK ka ndërtuar disa fusha sintetike falë projekteve të Hat-trickut dhe se fokusi i radhës do të jetë në ndërtimin e stadiumeve.
Në lidhje me Kombëtaren, Ademi diskutoi kampanjën aktuale në Ligën e Kombeve, përfshirë atmosferën brenda ekipit dhe trajtimin e ndeshjeve. Ai gjithashtu sqaroi situatën rreth përjashtimit të tre lojtarëve (Edon Zhegrova, Arijanit Muriq, dhe Florent Muslija) nga ekipi, duke theksuar se vendimi erdhi pas shkeljeve të rregullores së ekipit dhe ishte mbështetur nga trajneri Foda dhe FFK.
Ademi hodhi poshtë spekulimet për kërcënimet ndaj lojtarëve dhe sqaroi se vendimet për përjashtimin e tyre ishin marrë në mënyrë të përbashkët nga trajneri dhe FFK.
