Krerë shtetërorë e figura publike kanë reaguar pas rastit tragjik të humbjes së jetës së tre të rinjve në liqenin e Badocit.
Ministri i Punëve të Brendshme, Xhelal Sveçla, pas rastit ka bërë thirrje për kujdes në vozitje.
“Shpreh ngushëllimet më të sinqerta familjeve të viktimave dhe në këto momente të rënda për ta jemi në krah të tyre. Ju bëj thirrje të gjithë qytetarëve për vozitje të kujdesshme në mënyrë që të shmangim dhe të mos përsëriten aksidente të tilla”, ka shkruar ai në facebook.
Kreu i AAK-së, Ramush Haradinaj ka shprehur gjithashtu ngushëllimet e tij për familjarët nëpërmjet një reagimi në facebook, teksa ka kërkuar nga Policia e Kosovës zbardhjen e rastit.
“Këto janë momente të rënda për familjet dhe të afërmit e tyre, dhe në këto çaste dhimbjeje, dua t’u shpreh ngushëllimet e mia më të sinqerta. Lutemi që të gjejnë forcën për të përballuar këtë humbje të madhe. Ne jemi me ju në këtë moment të vështirë”, ka shkruar në anën tjetër i pari i Prishtinës, Përparim Rama.
Deri në këto momente dihet se njëri nga viktimat është gjetur në veturë dhe dy të tjerë në ujë. Për rastin kanë intervenuar edhe ekipi i shpëtimit të Forcave të Sigurisë së Kosovës.
