Deputetja e AAK-së Time Kadrijaj që këtë të hënë përfaqësoi partinë në mbledhjen e Kryesisë së Kuvendit, tha se pushteti po i kërkon ndihmën opozitës meqë nuk janë në gjendje të sigurojnë shumicën parlamentare.
Kadrijaj foli edhe për Komisionet Hetimore që tha se për shkak të afatit të shkurtër deri në zgjedhje nuk ka mundësi për krijimin e komisioneve të reja, por shtoi se është pikërisht pushteti që ka bllokuar deri tash punën e komisioneve ekzistuese hetuese në parlament.
“Unë e udhëheq Komisionin Hetimor për MPJD-në dhe ne kemi ngelur në vendnumëro sepse mazhoranca kanë kërkuar ta ndryshojnë rrjedhën e hetimit. Në Kuvendin e Kosovës është kërkuar të hetohet puna e MPJD-së në vitet 20121-2023, ndërsa ata kanë tentuar ta zhvendosin në vitin 2012, kanë tentuar ta ndryshojnë edhe vendimin e Kryesisë, çka ne nuk kemi lejuar”, tha tutje ajo.
Sipas Kadrijajt edhe në seanca të tjera partia në pushtet nuk do ta kenë shumicën e thjesht për shkak të largimit të deputetëve, por edhe të atyre që janë, tha ajo, nuk arrijnë të kenë votat.
“Prandaj kemi grumbullim të pikave të shumta dhe nuk mundemi të kalojmë në një seancë të re ku është dashur të debatohet , dhe detyrohemi t’i tërheqim edhe pyetjet parlamentare që kjo shumicë nuk i është përgjigjur. Kemi të bëjmë me një qeveri jo transparente që është sjellë me arrogancë, e sot jemi pa rezultate”, tha Kadrijaj.
