Korporata Energjetike e Kosovës njofton se ka përfunduar me sukses një projekt të rëndësishëm në TC Kosova A. Projekti, i fokusuar në instalimin e transformatorit të ri, ka si qëllim sigurimin e furnizimit me energji elektrike për shpenzimet e përbashkëta në TC Kosova A.
Bëhet e ditur se transformatori i ri, me kapacitet 40 MVA (220/6.3 kV), me vlerë prej rreth 1 milion euro, ofron një zgjidhje optimale për furnizimin e sigurt me energji elektrike, duke rritur në mënyrë të konsiderueshme sigurinë në njësitë e prodhimit.
“Transformatori ekzistues, i instaluar në vitet ’70, kishte probleme të shumta dhe humbje të mëdha energjie gjatë transformimit, duke qenë praktikisht i harxhuar dhe gati jo funksional. Vlen të theksohet se transformatori i ri ka humbje shumë më të vogla për shkak të eficiencës më të lartë në procesin e transformimit të energjisë elektrike nga një nivel tensioni në një tjetër”, thuhet në njoftimin e zyrës për informim të kësaj kompanie.
KEK-u thotë se kjo do të ndihmojë në përmirësimin e performancës energjetike të sistemit dhe do të kontribuojë në stabilitetin e furnizimit me energji elektrike. /Kosovatimes/
