Shefja e deputetëve të Vetëvendosjes, Mimoza Kusari- Lila tha se në Grupin Parlamentar që ajo drejton nuk ka krizë me numra sepse siç tha ajo aktualisht kanë 54 vota si parti dhe 8 të tjera nga grupi multietnik. Por, ajo e ka pranuar se sfidë mund të ketë gjatë kësaj periudhe.
Kusari- Lila në deklarimet pas mbledhjes së Kryesisë së Kuvendit tha se zakonisht kur kanë pasur mungesë kuorumi ka ardhur si pasojë e mospjesëmarrjes në votim të deputetëve të caktuar që kanë qenë në sallë e edhe për shkak të mungesës fizike të disa të tjerëve.
Por, shefja e deputetëve të partisë që udhëheqë me vendin nuk parasheh zhvillime dramatike në ditët në vijim kur është fjala tek Kuvendi.
“Unë uroj që me nivelin e njëjtë të mobilizimit të hyjmë në një periudhë më dinamike para përmbylljes së sesionit vjeshtor dhe është e domosdoshme që diku 54 projektligje që janë në mes të të dyja leximeve të përmbyllen në këtë legjislaturë. Nëse nuk votohen në lexim të dytë ato kthehen në pikën zero me përmbylljen e legjislaturës. Prandaj nuk do të donim të kishim një situatë që pas punës voluminoze që bëhet qoftë nga ana e sponsorizuesit e në Komisione Parlamentare, ligjet të kthehen prapa”, tha ajo.
E pyetur nëse edhe të larguarit nga LVV-ja do t’i votojnë projektligjet e caktuara, ajo tha nga informatat që ka, ata në projektligje të caktuara do të marrin pjesë në votim, por kjo çështje tha se mbetet të shihet.
Kusari- Lila foli edhe për kërkesat e Gjermanisë për heqjen e ndalesës ndaj mallrave serbe. Tha se është vendim i qeverisë që ka ardhur si rrjedhojë e një mase të sigurisë që erdhi në kohën e duhur.
“Përkundrejt që ndalesa është në fuqi nga qershori 2023 prapë ka ndodhur sulmi terrorist në shtator 2023 dhe prapë është zënë një sasi e madhe armatimi, që do të thotë se periudha e bartjes dhe transportit të armatimit ka qenë shumë e gjatë ose ka qenë në formë të organizuar. Derisa të krijohen mekanizmat e sigurisë në veçanti për dërgesat e kufirit verior, në momentin kur ka garanci për vendosjen e masave të sigurisë, atëherë mund të hiqet kjo masë . Do të thotë nuk ka qenë për çështje ekonomike, por për çështje të sigurisë”, tha tutje Kusari- Lila.
