Lidhja e Bizneseve të Kosovës paralajmëron se vendimet që lidhen me masa të sigurisë për importet nga Serbia duhet të jenë të bazuara në parime ekonomike dhe jo në motive populiste, pasi kjo po ndikon negativisht në imazhin e Kosovës si vend i favorshëm për investime.
Sipas LBK-së, këto masa jo vetëm që shkelin parimet e CEFTA-s, por po dëmtojnë edhe ambientin e të bërit biznes në vend. Duke përkujtuar angazhimet e Kosovës për integrim në Bashkimin Evropian dhe krijimin e një tregu të përbashkët rajonal, LBK i bën thirrje qeverisë që të shfaqë përkushtim të vazhdueshëm për eliminimin e barrierave tregtare.
Në deklaratën e tyre, LBK nënvizon se vendimet e qeverisë duhet të orientohen drejt përmirësimit të klimës së investimeve dhe nxitjes së tregtisë së lirë. Në të kundërt, këto vendime, sipas tyre, po shkaktojnë largimin e investitorëve dhe mund të sjellin rënie të mëtejshme ekonomike. /Kosovatimes/
