Ministria e Industrisë, Ndërmarrësisë dhe Tregtisë ka lansësuar skemën e granteve me synimin për forcimin e eko-sistemit, e inovacionit të kërkimit dhe zhvillimit, përmes zbatimit të një fondi brenda MINT-it, që kap shumën 1.9 milionë euro, si dhe të inkurajojë sektorin privat me ide dhe projekte inovative që do të ndikojnë direkt në ekonominë e vendit tonë.
Me këtë rast, ministrja Rozeta Hajdari falënderoi qeverinë e Luksemburgut për mbështetjen e vazhdueshme ndaj vendit tonë në projekte zhvillimore dhe instrumente financiare që ndikojnë në zhvillimin ekonomik dhe social në vend.
Ajo tutje tha se përmes kësaj skeme synimi është të inkurajojë sektorin privat me ide dhe projekte inovative që do të ndikojnë direkt në ekonominë ë vendit tonë.
“Përmes kësaj skeme synojmë të krijojmë vende të reja të punës, të rrisim eksportin, duke fuqizuar produkte inovative në sektorë të rëndësishëm ekonomikë”, deklaroi ministrja Hajdari.
Ajo, tutje, theksoi se të gjithë sektorët industrialë, prodhues-përpunues janë të përfshirë në këtë skemë.
Ministrja Hajdari më tej bëri të ditur se bashkë me Agjencinë KIESA, MINT ka nënshkruar edhe skema të tjera të lansuara gjatë këtij viti e që në këtë kuadër kjo e tanishmja është skema e pestë me radhë ku në tërësi janë 39 marrëveshje të skemës të nënshkruara mes KIESA-s me përfituesit, si dhe 167 marrëveshje të nënshkruara me biznese në kuadër të skemës për blerjen e e makinerive prodhuese për biznese në kuadër të 7 sektorëve të industrisë si prioritare në politikën industriale.
Veç kësaj, ministrja Hajdari njoftoi se shuma totale e këtij programi është 1.9 milionë euro dhe ndahet në dy llote.
“Skema totale e granteve për inovacion është 1.9 milionë euro dhe ndahet në dy llote. Lloti i parë ka të bëjë me mbështetje deri në 40 mijë euro, ndërsa lloti i dytë deri në 15 mijë euro”, tha ministrja Hajdari.
