Komuna e Drenasit njofton se në përputhje me Planin e Veprimit për Përcaktimin e Kritereve për Regjistrin e Banorëve në Kujdesin Parësor Shëndetësor, fillon projekti për përzgjedhjen e mjekut familjar brenda zonës së banimit.
Sipas njoftimit, ky projekt ka për qëllim krijimin e një liste të saktë të banorëve dhe pacientëve për mjekët familjarë, duke u fokusuar në një organizim më efikas të shërbimeve shëndetësore.
“Gjithashtu, krijimi i kësaj liste do të lehtësojë identifikimin e pacientëve me nevoja specifike shëndetësore, duke u mundësuar mjekëve të ndjekin nga afër historikun e tyre për parandalim dhe trajtim më cilësor të sëmundjeve”, thuhet në njoftim.
Komuna e Drenasit fton qytetarët që të shfrytëzojnë mundësinë për të përzgjedhur mjekun familjar përmes platformës shtetërore E-Kosova!
