Komisioni Qendror i Zgjedhjeve në mbledhjen e sotme ka vazhduar periudhën e aplikimit për regjistrim të votuesve jashtë Kosovës, e cila ka filluar më 29 gusht dhe do të përfundojë më 26 dhjetor 2024.
Në komunikatën për media thuhet se në bazë të të dhënave, deri më 6 tetor 2024, përmes platformës elektronike http://diapsora.kqz-ks.org janë pranuar 6,069 kërkesa për regjistrim, prej të cilave janë aprovuar 5,571, ndërsa 498 të tjera janë refuzuar.
“Në shumicën e rasteve të refuzuara, aplikuesit nuk janë fotografuar duke mbajtur njëkohësisht në dorë dokumentin e identifikimit”, thuhet në komunikatë.
Sipas komunikatës, është duke vazhduar periudha për ndërrimin e Qendrës së Votimit brenda komunës, e cila ka filluar më 29 gusht dhe do të përfundojë më 26 dhjetor 2024.
“Në bazë të të dhënave, deri më 6 tetor 2024 janë pranuar 744 kërkesa për ndërrimin e Qendrës së Votimit (574 përmes platformës elektronike http://qv.kqz-ks.org dhe 170 në zyrat e Komisioneve Komunale të Zgjedhjeve) prej të cilave janë aprovuar 725 kërkesa, ndërsa 19 të tjera janë refuzuar”, thuhet në komunikatë.
Tuje thuhet se në kuadër të përgatitjeve për organizimin e Zgjedhjeve për Kuvendin e Kosovës, të cilat do të mbahen më 9 shkurt 2025, ka filluar programi orientues i trajnimit për anëtarët e Komisioneve Komunale të Zgjedhjeve. Deri më tani, seancat e trajnimit janë mbajtur me anëtarë të Komisioneve Komunale të Zgjedhjeve nga komunat, si Mitrovicë e Jugut, Skenderaj dhe Vushtrri, Mitrovicë e Veriut, Zvçan, Leposaviq dhe Zubin Potok. Në ditët në vazhdim, programet e trajnimit do të mbahen edhe në regjionet tjera, si: Prishtinë, Prizren, Pejë, Gjilan, Ferizaj dhe Gjakovë.
“Në mbledhje KQZ ka vendosur për emërimin e dy anëtarëve të KKZ në komunat Obiliq dhe Ranilluk; zëvendësimin e dy anëtarëve të KKZ në komunat Junik dhe Mitrovica e Veriut; revokimin e emërimit të dy anëtarëve të KKZ në komunat Suharekë dhe Kamenicë dhe për përfundimin e mandatit të një anëtari të KKZ në komunën e Obiliqit”, thuhet në komunikatë.
Në këtë mbledhje, KQZ mori vendim për miratimin e rekomandimt të Zyrës për Regjistrim, Certifikim dhe Kontrollin Financiar të Subjekteve Politike për ndalimin e transferimit të mjeteve financiare nga Fondi, në vlerën e gjobës së shqiptuar, për subjektet politike të përfaqësuara në Kuvendin e Kosovës.
“Shuma e gjobës do të zbritet nga shuma e planifikuar t’i transferohet subjekteve politike për tremujorin e katërt të vitit 2024. Pas përfundimit të procesit të auditimit të raporteve vjetore financiare për subjektet politike, ZRCKFSP ka gjobitur disa subjekte politike pas gjetjeve të evidentuara gjatë auditivit”, theksohet në komunikatë.
