Ka vdekur në moshën shtatëdhjetë e tri vjeçare ish-ylli i Holandës dhe i Barcelonës, Johan Neeskens, ka njoftuar Shoqata Mbretërore Holandeze e Futbollit të hënën.
Neeskens ka bërë shtatëdhjetë e nëntë paraqitje për Kombëtaren holandeze dhe ishte një nga shtyllat kryesore të skuadrës së Holandës që kishte arritur në finalet e Kupës së Botës më 1974 dhe më 1978. Johan Neeskens e kishte shënuar golin e parë në finalen e Kupës së Botës 1974 kundër Gjermanisë Perëndimore.
Në Kupën e Botës të vitit 1974, Neeskens kishte përfunduar i dyti në listën e golashënuesve më të mirë me pesë gola, duke fituar Këpucën e Argjendtë. Holanda kishte humbur në finalen e atij turneu kundër Gjermanisë Perëndimore me rezultat 2-1. Katër vite më vonë, Argjentina e kishte mposhtur Holandën në finalen e radhës. Skuadrat e viteve 1974 dhe 1978 shpesh konsiderohen si “gjenerata e artë” e futbollit holandez, ku përfshihen lojtarë si Johan Cruijff, Johnny Rep, Ruud Krol dhe Willem van Hanegem.
“Bota jo vetëm që i thotë lamtumirë një sportisti të talentuar, por mbi të gjitha, një personi të dashur, të përkushtuar dhe të mrekullueshëm”, ka thënë KNVB pas ndarjes nga jeta të Neeskens.
